Idman.biz
Braziliya millisinin baş məşqçisi Karlo Ançelotti 40 yaşlı xorvatiyalı yarımmüdafiəçi Luka Modriçin "Milan"dakı çıxışı barədə fikirlərini bölüşüb.
İdman.Biz xəbər verir ki, mütəxəssis Modriç haqqında xoş sözlərini ifadə edib.
Ançelotti bildirib ki, Modriçin səviyyəsi onu heç də təəccübləndirmir: "O, "Real"da heç vaxt məşqləri buraxmazdı. Luka nizam-intizamlı, möhkəm genetikaya malik, ciddi, təcrübəli və şəxsi keyfiyyətləri yüksək olan futbolçudur. Bu cəhətlər ona 40 yaşında belə ən yaxşı yarımmüdafiəçilərdən biri olmağa imkan verir.
"Milan" Modriçin gəlişindən sonra daha da güclənib, lakin komandanın əsas yüksəlişi Alleqrinin təsiri ilə baş verdi – bu, dərhal hiss olundu. O, artıqdan mürəkkəbləşdirməyi sevməyən bir mütəxəssisdir və məhz buna görə də əla məşqçidir. Məncə, "Milan" İtaliya çempionluğunu qazana bilər. Avrokuboklarda iştirak etməmələri isə onlar üçün əlavə üstünlükdür".
Qeyd edək ki, Luka Modriç Ançelottinin rəhbərliyi altında Madrid "Real"ında 2013–2015 və 2021–2025 illərdə çıxış edib.
