Idman.biz
Karlo Ançelotti 2021-ci ildən çalışdırdığı Madrid "Real"ı ilə vidalaşıb.
İdman.biz xəbər verir ki, italiyalı məşqçi bununla bağlı sosial şəbəkə hesabında paylaşım edib.
Daha əvvəl "kral klubu" da cari mövsümün sonunda Ançelottinin komandadan ayrılacağını açıqlamışdı.
Paylaşımına "Bu gün biz yenidən vidalaşırıq" cümləsi ilə başlayan 65 yaşlı mütəxəssis sözlərinə belə davam edib: "Bu gün "Real"dakı fəaliyyətimin ikinci dövrü ərzində yaşadığım hər bir anı xatırlayıram. Bu illər unudulmaz oldu – duyğular, titullar və hər şeydən əvvəl klubun emblemini təmsil etməyin verdiyi qürurla dolu inanılmaz bir yolçuluq idi.
Prezident Florentino Peresə, kluba, futbolçularıma, əməkdaşlara və hər zaman mənə özlərindən biri kimi davranan unikal azarkeşlərə təşəkkür edirəm.
Birlikdə qazandığımız uğurlar "Real" azarkeşlərinin yaddaşında həmişə qalacaq – təkcə qələbələrə görə yox, həm də bu qələbələri necə qazandığımıza görə. "Bernabeu"dakı sehrli gecələr artıq futbol tarixinin bir hissəsinə çevrilib.
İndi yeni macəra başlayır. Amma "Real"la olan bağım əbədidir. Tezliklə görüşərik. Hala Madrid, elə bu qədər".
Qeyd edək ki, Ançelotti karyerasını Braziliya millisinin baş məşqçisi kimi davam etdirəcək.
İdman.biz
