Karim Rossi: "Ötən mövsüm başqa bir Azərbaycan klubundan da təklif almışdım, "Omoniya" cütün favoritidir"

"Şamaxı"nın yeni transferi Karim Rossinin Futbolinfo.az-a müsahibəsi

– "Şamaxı"dan təklifi nə vaxt qəbul etdin və bu qərarı necə verdin?

– Təklifi aldıqdan sonra qərar vermək üçün özümə bir həftə vaxt ayırdım. Bu müddət ərzində ailəmlə məsləhətləşdim, hər şeyi dəyərləndirdim. Daha sonra baş məşqçi ilə danışdım və qərarımı verərək "Şamaxı"ya gəlməyə razı oldum.

– Azərbaycana gəlməmişdən əvvəl ölkə haqqında nələr bilirdin? Burada tanıdığın futbolçu vardı?

– Azərbaycan haqqında əvvəlcədən məlumatım var idi, xüsusilə "Qarabağ" sayəsində. Bundan başqa, ötən mövsüm başqa bir Azərbaycan klubundan da təklif almışdım. Ona görə də buradakı futbol mühiti haqda müəyyən təsəvvürüm var idi.

– "Şamaxı" ilə əsas hədəfin nədir? Səncə, Azərbaycanda uğurlu olacaqsan?

– Burada əsas məqsədim mümkün qədər çox qol vurmaq və komandaya ötən mövsümdən daha yaxşı nəticələr əldə etməyə kömək etməkdir. Ümid edirəm ki, Azərbaycanda şansım gətirəcək və komanda olaraq uğurlu bir mövsüm keçirəcəyik.

– Azərbaycan klublarının avrokubok oyunlarına baxmısan? Onlar barədə fikirlərin necədir?

– Bəli, avrokuboklarda çıxış edən Azərbaycan komandalarının bütün oyunlarına baxmışam. Onların oyun üslubunu bəyənirəm, yaxşı futbol nümayiş etdirirlər və düşünürəm ki, daha irəli getməyi haqq edirlər. Xüsusilə "Araz-Naxçıvan"ın "Aris"ə qarşı oyunu çox təsirli oldu.

– Daha əvvəl Kiprdə oynamısan və bu gün Kipr klubu "Omoniya" ilə "Araz-Naxçıvan" qarşılaşacaq. Bu oyunla bağlı nə düşünürsən?

– "Omoniya" cütün favoritidir, lakin "Araz-Naxçıvan"ın "Aris"ə qarşı necə oynadığını gördükdən sonra düşünürəm ki, onlar da şanslı ola bilər. Əgər eyni səviyyədə performans göstərsələr, bu qarşılaşmada sürpriz edə bilərlər.

İdman.biz