Idman.biz
Ağdamın "Qarabağ" klubunun Çempionlar Liqasının ümumi mərhələsinin ilk turunda səfərdə "Benfika" üzərində 3:2 hesablı tarixi qələbə qazanması təkcə futbolsevərlərdə deyil, digər idman növlərini sevənlərdə də xoş təəssürat yaradıb.
Bu sözləri karate üzrə Azərbaycan milli komandasının baş məşqçisi Şahin Atamov dünənki oyundan sonra İdman.biz-ə müsahibəsində deyib.
"Söz tapmaq olmur - emosiyalar dolub-daşır! Əlimdə olsaydı, Qurban Qurbanova heykəl qoyardım. "Qarabağ"ın dünən gecə etdiklərini ifadə etmək çətindir. Ağdamlıların qələbəsi bir yana, heç-heçəyə inananlar az idi. Amma bunu bacardılar! Məşqçi kimi Qurban Qurbanov və onun metodları istənilən idman növü üçün sadəcə etalondur", - deyə Atamov bildirib.
Baş məşqçi karateçilərin hazırlığı və komandanın gələcək planlarından da danışıb.
"Hazırda biz çox ciddi yarışlara intensiv hazırlaşırıq və bu cür müsbət emosiyalar karateçilərimizi yalnız motivasiya edir. Qarşıda bizi MDB Oyunları, Dünya Çempionatının seçmə turniri, sonra İslam Oyunları və nəhayət noyabrın sonunda Misirdə keçiriləcək Dünya Çempionatı gözləyir. Ümid edirəm ki, karateçilərimiz dünya arenalarında futbolçularımızdan zəif çıxış etməyəcəklər, bizim uşaqların buna potensialı da var", - Atamov əlavə edib.
Vüqar Vüqarlı
İdman.biz
