Sport24.az
CEYHUN ƏLİYEV
Emin Mahmudov artıq "Neftçi"nin kapitanı deyil. Bununla bağlı paylaşım edən yarımmüdafiəçi bazubəndi 6 il fəxrlə daşıdığını dilə gətirib. İstənilən komandanın kapitanı olmaq şərəfdir, ələlxüsus da "Nefrçi" kimi çəkiyə sahib klubun. Ancaq məsələ burasındadır ki, bazubəndin qolda olması hələ kapitan olmaq anlayışına gəlmir.
Kapitan komandanın ən yaxşı oyunçusu olmaq demək deyil. Kapitan komandanın ən yaşlı oyunçusu (və ya oyunçularından biri) olmaq anlamına da gəlmir. Kapitan olmaq üçün ruh olmalıdı. O bazubəndin daşıyıcısı bunu məşqdə də, oyunda da, kollektivlə birlikdə əylənəndə də nümayiş etdirməlidi. Deyək ki, məşq və asudə vaxt zamanı kluba aidiyyatı olmayanların bunu görməsi demək olar ki, mümkünsüzdü. Bəs oyunda?
"Bəxt üzüyü" filmində deyilən və dillər əzbərinə çevrilən ifadədən istifadə etmək istəyirəm: "Pobolşe zəhrimara". Emin Mahmudovun simasında nə vaxtsa həmin "zəhrimar"dan görən olub? Bəli, futbolçu keyfiyyətləri Azərbaycan ölçüləri ilə (Azərbaycan ha!) müsbət fikir söyləməyə əsas verir. Ancaq axı, biz Mahmudovun İsveçin qapısına vurduğu qolu müzakirə etmirik.
Emin Zaur Tağızadədən sonra "Neftçi"nin növbəti simvoluna çevrilə bilərdi. Ancaq Rusiya turnesi öncəsi Türkiyənin aşağı divizionundan gələn daha sərfəli təklifin cazibəsi onu elə məst etdi ki, forma sevgisi unuduldu və yalnız ən yüksək səviyyədə "eksklüziv" təklif aldıqdan sonra "ağ-qaralar"ın toplanışının son hissəsində iştirak etdi.
Biz vaxtilə Rəşad Sadıqov kimi Kapitan görmüşük, istər "Neftçi"də olsun, istərsə də millidə. Adam 22 yaşında ikən sarğıya sahib çıxanda kiminsə zərrə qədər şübhəsi qalmırdı ki, bazubənd məhz onda olmalıdı. Mahmudov isə onsuz da "0"-a yaxın olan kapitanlıq ambisiyasının son hissəciyini millimizin oyununda itirdi. Bəli, Ramil Şeydayev həmin epizodda olduqca pis hərəkət etmişdi, ancaq əsl kapitan topu ona güzəştə getməməli idi.
Bəli, "Neftçi" bu gün ən ağır günlərini yaşayır. Belə bir məqamda baş məşqçi kapitanı dəyişirsə, deməli, Mahmudov tək meydanda deyil, məşqdə də, kollektivin asudə vaxtı keçirdiyi zaman da lider olmağı bacarmır. O ki qaldı Şeydayevə, oyunçu keyfiyyətlərinə görə, böyük ehtimalla, Emindən geri qalır, ancaq "pobolşe zəhrimara" mövzusunda komandanın 2 oyunçusundan (digəri Yuri Matias) biridir. İndiki halda isə Emin Mahmudov küsəyənlik nümayiş etdirmək əvəzinə, itirdiyi kondisiyalarını qaytarmaq haqda düşünməlidi.
