Kamran Quliyev: "Həmişə də ilk tənqid atamdan gəlir”

"Səbail" ilə görüşdə mövsümdə ilk oyununa çıxan Kamran Quliyev vurduğu qolla "Sumqayıt"ın qələbəsində pay sahiblərindən biri olub. 24 yaşlı hücumçu Sport24.az-a müsahibəsində həm debütündən danışıb, həm də bizi maraqlandıran başqa sualları cavablandırıb.

- "Səbail" üzərində qazanılan qələbədə sənin də töhvən oldu. Oyunla bağlı fikirlərini bölüşməyini istərdik...
- Çətin oyun olacağını əvvəlcədən bilirdik. Matç bizim üçün "ağır" keçdi. 90 dəqiqənin taleyini bir qol həll edəcəyini fikirləşdiyimiz anda qapımızda qol gördük. Ruhdan düşmədik və son saniyələrdə istədiyimiz nəticəni əldə edə bildik. Qələbə qazandığımız üçün sevincliyik, uğurumuzu davam etdirmək istəyirik.

- Mövsümdə ilk qolunu vurdun. Oyundan öncə fərqlənəcəyini düşünürdün?
- Əslində, mövsümdə ilk oyunuma çıxdım və qol vurdum. Əlbəttə ki, buna görə çox sevincliyəm. Əvvəlcədən qol vuracağımı güman etmirdim. Amma məşqlərdə üzərimdə çox çalışırdım ki, fərqlənim.

- Ötən mövsüm çoxları "Sumqayıt"ın mükafatçılar sırasında yer alacağını gözləmirdi, amma komandanız bunu bacardı. Necə fikirləşirsən, bu il də ən azı ötən mövsümkü nəticəni təkrarlaya bilərsiz?
- Hələ mövsüm yeni başlayıb. Qarşıda uzun marafon var. Əlbəttə ki, istərdik ki, minimum ötənilki nəticəni təkrarlayaq, mükafatçılar arasında yer alaq. Son üç oyun göstərdi ki, pis çıxış etmirik. İki qələbə bir yenilgi almışıq. Hətta məğlub olduğumuz qarşılaşmada belə üstün performans sərgilədik. Sadəcə, əlimizə düşən fürsətləri qola çevirə bilmədik. İrəlidəki turlarda daha da yaxşı oynayacağıq.

- Futbolçu ailəsində dünyaya göz açmısan. Atan Rüfət Quliyev ölkə futbolunda tanınmış simadı. Hər oyundan sonra valideyninlə söhbət edir, onunla müzakirələr aparırsan?
- Tənqidlər əlbəttə ki, olmalıdı. Tənqidlərə açıq biriyəm. Həmişə də ilk tənqid atamdan gəlir. Hər oyundan sonra atamla çıxışımı dəyərləndiririk. Atamın iradları mənim üçün çox vacibdi və futbolçu kimi inkişafıma da təsiri var.

ABDULLA İSMAYILOĞLU