Sport24.az
"Neftçi" ilə matçda çox yaxşı mübarizə apardıq. Hər iki komanda qələbə üçün əlindən gələni etsə də, sonda heç-heçə qeydə alındı". Bu sözləri Sport24.az-a açıqlamasında "Karvan-Yevlax"ın qapıçısı Kamran İbrahimov deyib.
İbrahimov Misli Premyer Liqasının 6-cı turunda baş tutan "Neftçi" ilə matç barədə danışıb:
"Futbolda ilk addımlarımı "Neftçi"nin Futbol Akademiyasında atmışam. Peşəkar futbola da orda başlamışam. Keçmiş komandamda bəzi futbolçularla bu gün də əlaqəm var. Onlara qarşı oynamaq nostalji hisslər yaratdı. Mənim üçün yadda qalan oyun oldu. Hər matça necə hazırlaşırdımsa, bu oyuna da eyni hazırlaşmışdım. Hazırda "Karvan-Yevlax"ın futbolçusuyam, bu komandanın çörəyini yeyirəm. Ona görə də klubun uğur qazanması üçün əlimdən gələni edirəm".
İbrahimov növbəti turda qarşılaşacaqları "Sabah"la matçdan gözləntilərini açıqlayıb:
"Sabah" yaxşı komandadır. "Neftçi" kimi gücü hamıya bəllidir. Amma Masazır təmsilçisindən də xal almaq olar. "Neftçi" ilə oyundakı kimi mübarizə aparsaq rəqibdən xal və ya xallar alacağıq".
Qeyd edək ki, "Karvan-Yevlax" Misli Premyer Liqasında 6 turdan sonra 5 xalla 10-cu pillədədir.
