Idman.biz
"Kamp Nou" stadionunun yaxınlığında miqrant işçilərin deportasiyasına qarşı etiraz aksiyası keçirilib.
Bu barədə İdman.Biz "Marca"ya istinadən məlumat verir.
Məlumata görə, etiraz aksiyası İspaniyada və o cümlədən, stadionun yenidən qurulması işlərində sənədsiz işləyən təxminən 50 işçinin işdən çıxarılması və deportasiyasına diqqət çəkmək üçün "CCOO del Habitat" həmkarlar ittifaqı tərəfindən təşkil edilib. Həmkarlar ittifaqının məlumatına əsasən, işəgötürən Türkiyədən olan işçiləri heç bir zəmanət olmadan geri qaytarmaq niyyətindədir.
"Onlardan bəziləri bir ildən çoxdur ki, həftənin yeddi günü, gündə on iki saat işləyirlər. İşçilər sənədsizdir və onları öz ölkələrinə geri göndərmək niyyəti ilə işdən çıxarılırlar.
Türkiyə torpağına ayaq basdıqları andan etibarən özlərini müdafiə etmək qabiliyyətləri ciddi şəkildə sarsılacaq. "Barselona" bütün bu problemləri eşitmək istəmir", - deyə "CCOO del Habitat"ın Kataloniyadakı rəhbəri Karlos del Barrio bildirib.
Həmkarlar ittifaqı işçilərin leqallaşdırılmasını, eləcə də immiqrasiya qaydalarında nəzərdə tutulmuş fövqəladə leqallaşdırma mexanizminin aktivləşdirilməsini tələb edir. Əmək müfəttişliyinə mövcud vəziyyət barədə artıq məlumat verilib.
