Sport24.az
FIFA referisi Kamal Umudlunun Misli Premyer Liqasının XIV turunun oyunlarına təyinat almamasının səbəbi bəlli olub. Sport24.az bu barədə etibarlı mənbədən məlumat əldə edib.
AFFA Hakimlər Komitəsinin yeni sədri Rəhim Həsənov ədalət təmsilçisini cəzalandırıb.
Buna referinin dekabrın 3-də keçirilmiş "İmişli" - "Sabah" qarşılaşmasında səhv qərar verməsi səbəb olub.
Umudlu matçın əsas vaxtının sonlarında paytaxt təmsilçisinin futbolçusu Umarali Raxmonaliyevin əllə oynadığını əsas gətirərək penalti təyin edib. Maraqlıdır ki, hakim bu qərarı VAR-a baxdıqdan sonra verib. Top isə oyunçunun üzünə dəyib.
"Sabah" əlavə vaxtda 2:1 hesablı qələbə qazanıb və 1/4 finala yüksəlib.
Hakimlər Komitəsinin sədri məhz bu səbəbdən cari turda Kamal Umudluya "istirahət" verib. Onun XV turda da təyinat almayacağı gözlənilir.
Qeyd edək ki, XV tur dekarbın 13-də start götürəcək.
