Kamal Bayramov: "Guya nə vaxt yüksək nəticə vermişdik ki..."

"Milli komandanın ilk belə oyunu deyildi. Guya nə vaxt yüksək nəticə vermişdik ki, indi məğlubiyyətlə barışmırıq? Potensialımız budur, barışmalıyıq". Bu sözləri Sport24.az saytına açıqlamasında Kamal Bayramov deyib.

"Şamaxı"nın qapıçısı millimizin Haitiyə məğlub olduğu oyunla bağlı fikirlərini bölüşüb:

"Müəyyən dövrlərdə hansısa qələbəmiz olur. Ancaq ümümi götürəndə yığmamızdan böyük nəticə gözləmək qeyri-mümkündür. Futbolçular vuruşdular, fərqlənmək üçün epizodlar var idi. Bəlkə də, qol olsaydı, oyunun gedişi fərqli ola bilərdi. Gələcəyə baxmaq lazımdır ki, çıxış yolunu tapaq. U-21 milli komandanın oyunu mənə çox xoş təsir etdi. Top olan yerdə 3-4 nəfər pressinq tətbiq edirdi. Düzdür, bu il həmin uşaqların arasında Premyer Liqada çıxış edənlər var. Amma inanmıram ki, həmin futbolçulardan gələn il elitada oynayan olsun. Uzağı 1-2 futbolçu meydana çıxmaq şansı qazanacaq. Beş-altı il sonrani fikirləşməliyik".

Təcrübəli çərçivə qoruyucusu matçın ikinci hissəsində qırmızı vərəqə alan Elvin Cəfərquliyevin Azərbaycan futboluna lazımlı kadr olduğunu da bildirib:

"Futbolçu kimi Elvin Cəfərquliyevi başa düşürəm. Aqressiv oyunçusur, millimiz üçün lazımlı kadrdır. Oyunun içində olan insanlar daha yaxşı başa düşər. Hamı eyni xaraktedə olmur. Hansısa oyunda deyirlər ki, Elvin kimi 11 oyunçumuz olsaydı, daha yaxşı olardı. Hansısa qarşılaşmada "qırmızı" alırsa, deyirlər Elvin olmasaydı, daha yaxşı olardı. Müxtəlif fikirlər var. Əlbəttə, gələcək karyerası üçün bunları yığışdırılmalıdır. Özüm də aqressiv futbolçu kimi onu yaxşı başa düşürəm. Elvin Azərbaycan futboluna lazımdır.

Qeyd edək ki, yığmamız Haitiyə üç cavabsız qolla məğlub olub.