Sport24.az
"Millinin futbolçuları heç də ideal idman formasında deyillər. İslandiya ilə oyunda göründü ki, taktiki-texniki tapşırıqları yerinə yetirə bilmirlər". Bu sözləri Sport24.az-a açıqlamasında Kamal Bayramov deyib.
Veteran qapıçı millimizin DÇ-2026-nın seçmə mərhələsi çərçivəsində Ukrayna yığması ilə qarşılaşacağı oyundan gözləntilərini açıqlayıb:
"Yığmaya çağırılan heyətdə 6 oyunçu komandasında stabil oynayır, qalanları yox. Hansısa qərarları veririksə, milli komandamızı düşünməliyik. Çempionat davam etdikcə, daimi oynayan yerli futbolçuların sayı azalacaq. İslandiya ilə matçda gördük ki, limitin ləğvi bizə faydalı qərar deyil. Nəinki milli komanda, U-21-də Portuqaliya ilə oyunda bir hissə dözə bildi. Ordakı futbolçularda öz komandalarında əsas heyət üzvü deyillər. Ukrayna ilə matçda istəyərdik yaxşı oyun izləyək, amma futbolçularımızda motivasiya da aşağıdır və bu üzdən uğurlu nəticə gözləmirəm. Sadəcə, xarakter hesabına nəyəsə nail olmaq olar. Bu da futbolçuların üzərinə düşən vəzifədir, məşqçi rol oynamır".
Qeyd edək ki, Azərbaycan – Ukrayna qarşılaşması sentyabrın 9-da, saat 20:00-da Tofiq Bəhramov adına Respublika Stadionunda baş tutacaq.
