Idman.biz
"Kalyari"nin əsas qapıçısı Elia Kaprile A Seriyasının sonuncu – 38-ci turunda "Napoli"yə qarşı keçiriləcək oyunda start heyətində yer almayacaq.
İdman.biz "Cronache della Campania"ya istinadən xəbər verir ki, baş məşqçinin bu qərarı 23 yaşlı qolkiperin məğlubiyyətdə maraqlı olması səbəbindən verilib.
Belə ki, "Napoli" bu oyunda qələbə qazanacağı təqdirdə, bu kluba məxsus Kaprile karyerasında ilk dəfə İtaliya çempionu olacaq.
Kaprile cari ilin yanvar ayında icarə əsasında "Kalyari"yə keçib. Mövsümün ilk yarısında o, "Napoli" ilə A Seriyada 4 oyun keçirib. Bu isə o deməkdir ki, Elia "Kalyari"nin məğlubiyyətində maraqlı ola bilər: "Napoli"nin qələbəsi Kaprilenin də "skudetto"nu qazanması demək olacaq.
Qeyd edək ki, bu gün A Seriyasının 38-ci turu çərçivəsində keçiriləcək və çempionu müəyyənləşdirəcək "Napoli" – "Kalyari" və "Komо" – "İnter" matçları Bakı vaxtı ilə saat 22:45-də başlayacaq.
İdman.biz
