Idman.biz
"Çelsi"yə qarşı evdə oynayacağıq, azarkeşlərin də dəstəyi olacaq. Amma heç vaxt azarkeş sənin yerinə meydana çıxıb qaçmır, sənin üçün qələbə qazanmır. On bir nəfər o bir nəfərə qarşı meydanda mübarizə aparacaq".
"Qarabağ"ın braziliyalı futbolçusu Kadi Borges növbəti həftə Bakıda UEFA Çempionlar Liqasının IV turunda İngiltərənin "Çelsi" klubuna qarşı keçiriləcək oyuna hazırlaşmadıqlarını bildirib: "Hələ hazırlıqlara başlamamışıq. Sabahdan etibarən bu oyuna hazırlaşacağıq. Qələbə qazanmaq və yaxşı nəticə əldə etmək üçün çox qaçmalı, meydanda mübarizə aparmalıyıq. Azarkeşlərin dəstəyi çox vacibdir, amma biz də nəsə ortaya qoymalıyıq", - deyə teleqraf-a açıqlamasında deyib.
Kadi Azərbaycan Premyer Liqasının X turunda səfərdə "İmişli"ni 2:0 hesabı ilə məğlub etdikləri oyun barədə də danışıb:
"Çətin oyun oldu. Ümumiyyətlə, beşli müdafiə və qarşılarında üç hücumçu ilə oynayan komandaya qarşı mübarizə aparmaq həmişə çətin olur. Səbrlə çıxış etdik, bir neçə qol imkanı yaratdıq. Düzdür, bir neçəsini qaçırdıq, amma çox şükür ki, qalib gələ bildik. Ümumiyyətlə, bu tip oyunlarda çıxış yolu tapmaq və qələbə qazanmaq çox önəmlidir.
Rəqib komanda bu il elitaya yüksəlib deyə, hər kəs onlara necə gəldi qol vurmalı deyil. "İmişli" yaxşı komandadır. Oyunda da gördünüz ki, birəbir mübarizələrdə yaxşıdırlar, üstəlik, beşli müdafiə ilə oynayırdılar. Belə oyunlarda asanlıqla qol vurmaq mümkün deyil. O demək deyil ki, debütant komandadır deyə, hər gələn onlara beş top vurmalıdır. Pis komanda deyillər, çox qapalı oynayırlar. Çətinliklə də olsa, bu müdafiəni yarıb boşluqlar tapıb qələbə qazana bildik".
Braziliyalı futbolçu "Çelsi" ilə görüşə hazırlıqlar üçün yetərincə vaxt olduğunu düşünür: "Görürsünüz ki, istənilən rəqibə qarşı eyni fəlsəfə, eyni sistem və eyni oyun tərzi ilə çıxış edirik. Ona görə də baş məşqçinin sırf "Çelsi" ilə oyuna görə hansısa ciddi dəyişiklik etməsi gözlənilmir. Bu oyun da özlüyündə həmin matça bir hazırlıq idi. Mənə elə gəlir ki, bütün oyunlara eyni formada hazırlaşmaq lazımdır. Peşəkar futbolçu kimi mən oyunlar arasında fərq qoymuram. Təbii ki, bu oyun başa çatdı, növbəti oyun isə yeni və vacib qarşılaşmadır".
Qeyd edək ki, "Qarabağ" – "Çelsi" oyunu noyabrın 5-də Tofiq Bəhramov adına Respublika Stadionunda keçiriləcək və saat 21:45-də start götürəcək.
