Sport24.az
"Qarabağ"ın futbolçusu Kadi Borges Misli Premyer Liqasının X turunda "İmişli"ni məğlub etdikləri matçdan sonra jurnalistlərin suallarını cavablandırıb.
Sport24.az həmin müsahibəni təqdim edir…
- Oyun haqqında fikrin necədir?
- Çətin qarşılaşma oldu. Beşli müdafiə və qarşılarında da üç oyunçu ilə oynayırdı rəqib. Bu tip komandalara qarşı mübarizə aparmaq həmişə çətindir. Səbirlə oynadıq. Bir çox qol imkanları yaratdıq. Qol imkanlarımızı qaçırsaq da, Allaha şükr bəzilərini vurduq. Bu tip oyunlarda belə çətinliklərlə üzləşdikdə, çıxış yolu axtarmaq, qol vurmaq və qələbə qazanmaq çox vacibdir.
- "Çelsi" ilə oyundan öncə "İmişli" ilə qarşılaşmaq sizə necə təsir etdi?
- Mənə elə gəlir ki, bütün oyunlara eyni formada hazırlaşmaq lazımdır. Mən peşəkar idmançı kimi belə görürəm. Heç bir oyunlara fərq qoymuram, "İmişli" ilə oyun olsun, ya "Çelsi" ilə görüş olsun. "İmişli" ilə matç başa çatdı, artıq növbəti vacib görüş "Çelsi"yə qarşıdır.
- "Atletik"ə səfərdə uduzdunuz. Yəqin ki, səhvlərinizdən nəticə çıxarmısız. Bütün bunları nəzərə alsaq, "Çelsi" ilə doğma divarlar arasında uğurlu nəticə qazanacağınıza inanırsan?
- Təbii ki, təcrübə öz yerində, evdə oynadığımız üçün də azarkeşlərimizin də dəstəyi olacaq. Amma heç vaxt azarkeş sənin üçün meydana çıxıb qaçmır. Meydanda 11 nəfər 11 nəfərə qarşı oynayacaq. Biz bilirik ki, qələbə və ya müsbət nəticə üçün meydanda qaçmalıyıq, mübarizə aparmalıyıq, meydanda hər şeyimizi qoymalıyıq. Dediyim kimi, azarkeşlərin dəstəyi öz yerində, amma biz də nəsə əldə etmək üçün mübarizə aparmalıyıq.
- "İmişli" ilə oyundan sonra "Çelsi" ilə matça hazırlaşmaq üçün 5 gününüz qalacaq. Zaman sizin üçün yetərlidir?
- Biz hər rəqibə qarşı eyni formada, eyni sistemlə, eyni fəlsəfə ilə oynayırıq. Ona görə də, məşqçinin sırf "Çelsi" ilə oyuna görə nəyisə dəyişməsi, hansısa ciddi dəyişikliyə əl atması gözlənilən deyil. Biz hər rəqibə qarşı eyni oynayırıq deyə, "İmişli" ilə oyun da "Çelsi" matçına hazırlıq idi.
- "İmişli" ilə görüşdə cəmi 2 qolla qalib gəldiz, hətta bir neçə epizodda qol şansı da verdiz. ÇL-də oynayan komanda Premyer Liqanın debütantına qarşı niyə belə çətinlik çəkdi?
- Bunun heç bir əlaqəsi yoxdur. "İmişli" Premyer Liqaya bu il çıxıb deyənə, hər kəs onlara hardan gəldi, necə gəldi qol vurasıdır? Axı "İmişli" yaxşı komandadır, daim birəbir mübarizə gedirdi, beşli müdafiə ilə oynayırdılar. ASan deyil. Bu il çıxıblar deyə, gələn-gedən "İmişli"yə 5 qol vurmalı deyilki. "İmişli" pis komanda deyil, çox qapalı oynayırdılar. Çətinliklə də olsa, müdafiəni yardıq və iki qol vurduq.
- Qurban Qurbanovun futbolçuları cəzalandırdığı deyilir. Bu məsələyə necə şərh verəcəksən?
- Bu sualları ona versəniz yaxşıdır (gülür).
- Cəza yoxdur, ya necə?
- Deyə bilmərəm (gülür).
