Idman.biz
Ağdamın "Qarabağ" klubunun sabiq hücumçusu Olavio Juninyo bu qış Braziliyanın "Flamenqo" komandasını tərk edə bilər.
İdman.Biz "Globo"ya istinadən xəbər verir ki, 28 yaşlı hücumçu hazırkı klubunda demək olar ki, oyun praktikasına malik deyil.
Hətta zədələnmiş Pedrunun yoxluğunda baxmayaraq, komandanın baş məşqçisi Filipe Luis hücumun mərkəzində Juninyodan çox Brunu Enrike və ya Qonsalo Plataya üstünlük verir. Futbolçu isə ona daha çox oyun praktikasının veriləcəyi ilə bağlı klub rəhbərliyinin vədinin yerinə yetirilməməsindən sonra "etimadsızlıq" və "nüfuz itkisi" hissi yaşadığını bildirib.
Xatırladaq ki, yayda "Flamenqo" Səudiyyə Ərəbistanı klublarından, o cümlədən "Ər-Riyad"dan gələn icarə təkliflərini rədd etmişdi. Həmin vaxt "Qarabağ"ın da Juninyoya maraq göstərdiyi bildirilmişdi. Lakin braziliyalı hücumçu komandada qaldı və vəziyyət dəyişmədi. İndi onun qışda klubdan ayrılma ehtimalı xeyli artıb.
"MundoBola" nəşri yazır ki, futbolçu "Qarabağ"a mümkün qayıdışı ilə bağlı danışıqlar aparır. Qeyd olunur ki, ağdamlılar onu 2026-cı ilin iyun ayınadək icarəyə götürməkdə maraqlıdırlar, lakin "Flamenqo" oyunçunun satılmasına üstünlük verir.
Juninyonun Braziliya klubu ilə müqaviləsi 2028-ci ilin sonunadək sonunadək qüvvədədir və onun "Qarabağ"dan transfer məbləği təxminən 5 milyon avro (9.9 milyon AZN) təşkil edib.
