Idman.biz
Portuqaliyanın "Benfika" klubunun baş məşqçisi Joze Mourinyo etiraf edib ki, Çempionlar Liqasının qrup mərhələsinin startında "Qarabağ"a məğlubiyyət komandanı turnir siyahısında çətin vəziyyətə salıb.
İdman.Biz xəbər verir portuqaliyalı mütəxəssis bu barədə UEFA Çempionlar Liqasının əsas mərhələsinin altıncı turunda "Napoli" ilə oyundan sonra təşkil edilən mətbuat konfransında deyib.
"Bizim altı xalımız var. Əgər "Benfika" qrupun ilk oyununda evdə "Qarabağ"a uduzmasaydı, indi doqquz xalımız olardı və növbəti mərhələyə çıxmağa bir addım qalardı", - deyə J.Mourinyo vurğulayıb.
Portuqaliyalı mütəxəssis deyib ki, həmin məğlubiyyət komandanın işini çətinləşdirib.
"Təqvim inanılmaz dərəcədə ağırdır, lakin o məğlubiyyət bizi dərhal əlverişsiz vəziyyətə saldı. Buna görə də bugünkü qələbə olduqca vacib idi - yoxsa hekayə burada bitəcəkdi", - deyə o əlavə edib.
Qeyd edək ki, Çempionlar Liqasının əsas mərhələsinin 6-cı turunda "Benfika" Lissabonda İtaliyanın "Napoli" klubunu 2:0 hesabı ilə məğlub edib.
Xatırladaq ki, elə həmin Lissabonda "Qarabağ" qrupun ilk turunda "Benfika" üzərində 3:2 hesabı ilə qələbə qazanmışdı. Məhz bu məğlubiyyətdən sonra Lissabon klubu baş məşqçi Brunu Lajı istefaya göndərmiş, onun yerinə isə Joze Mourinyo təyin olunmuşdu. Həmçinin əlavə edək ki, ÇL-in 5-ci turunda ağdamlılar səfərdə "Napoli"yə 0:2 hesabı ilə uduzmuşdu.
Teymur Tuşiyev
