Sport24.az
"İmişli" Misli Premyer Liqasının 9-cu turunda səfərdə "Kəpəz"i 3:0 hesabı ilə məğlub edib. Sport24.az xəbər verir ki, qonaqların baş məşqçisi Jorj Kaşkilya matçdan sonra keçirilən mətbuat konfransında jurnalistlərin suallarını cavablandırıb:
- Bizim üçün çətin durumdur. Vüsal Qənbərov ağır zədə aldı. Bu, komandaya psixoloji cəhətdən mənfi təsir etdi. İlk yarıda bərabər oyun gedirdi. Birinci hissənin sonunda bizə qol lazım idi, onu da vurduq. Fasilədə uşaqlarla söhbət etdik. Bütün oyunçular Vüsalı düşünürdü. Onlar üçün toparlanmaq çətin idi. Söhbərlərdən sonra futbolçuları oyuna kökləyə bildik. 3 qol vurduq. Daha da çox vura bilərdik. Hamımız Vüsalı düşünürük. Qalibiyyətə layiq idik. Hamımız qələbəni Vüsal Qənbərova həsr edirik.
- Vüsal Qənbərovun zədəsi ilə bağlı məlumat verə bilərsiz?
- Ayağında sınıq var. Sınığın nə dərəcədə olduğunu hələ ki bilmirik. Tibbi müayinədən sonra dəqiq biləcəyik.
- İkinci hissəfə Juninyo və Almeyda bir neçə epizodu dəyərləndirə bilmədi. Oyun bitəndən sonra onlarla söhbət etdiniz?
- Xəzər Mahmudov və İdris İnqilablının da qol epizodları var idi. Bu cür epizodları yarada bildiyimiz üçün şadam. Amma bunları dəyərləndirmək vacibdir. Məşqlərdə bunun üzərində çalışacağıq.
- Sizcə, Premyer Lliqada qalmaq üçün nə qədər xal toplamaq lazımdır?
- Ötən mövsümlə müqayisədə Premyer Liqada komanda sayı artıb. Bizim məqsədimiz xal saymaq yox, hər oyunda xal qazanmaqdır. Biz sürpriz komandayıq. Aşağı liqadan gəlsək də, kifayət qədər xal toplaya bilmişik. Texniki məğlubiyyəti saymasaq, komanda olaraq meydanda 15 xal qazanmışıq. 30 xalı düşünmək fikrimiz yoxdur.
- Növbəti turda rəqibiniz "Qarabağ" olacaq. Onlara qarşı xüsusi planınız var?
- Planları oyundan-oyuna qururuq. "Qarabağ"la matçdan əvvəl kubok oyunumuz var. Bütün diqqətimiz həmin qarşılaşmadadır. Daha sonra "Qarabağ"ı düşünəcəyik. Əlbəttə ki, "Qarabağ" çox güclüdür, onlarla oyun çətin olacaq.
