Idman.biz
"Oyun gözlədiyimiz kimi çox çətin keçdi. Meydanın bu vəziyyətdə olması çətinliyi daha da artırmışdı".
İdman.biz bildirir ki, bu sözləri Misli Premyer Liqasının 6-cı turunda "Zirə" ilə oyundan (1:1) sonra "İmişli"nin baş məşqçisi Jorj Kaşkilya deyib.
"Zirə" çempionatın ən güclü komandalarından biridir, çempionluğa oynayan komandadır. Çox çətin oyun oldu. Buna baxmayaraq, uşaqlar özlərini itirmədilər, layiqli mübarizə apara bildilər. Birinci hissədə vurulan qol bizim üçün çox vacib idi. Buna görə ikinci yarıya daha rahat başladıq. Belə komanda ilə oyunda heç-heçə bizim üçün pozitiv nəticədir", - baş məşqçi qeyd edib.
Kaşkilya komandasının "Qarabağ"a da qalib gələ biləcəyini istisna etməyib: "Əlbəttə ki, mümkündür. Top yumrudur. Bu, futboldur. Kiminsə bəxti daha çox gətirə bilər. Əgər "Qarabağ"ın pis günü, bizim isə yaxşı günümüzdürsə, mümkündür. Əksi də ola bilər. Nəzərə almaq lazımdır ki, "Qarabağ" çempionatın ən güclü komandasıdır".
