Idman.biz
"İnter Mayami"nin müdafiəçisi Jordi Alba Lionel Messinin heç kimlə müqayisə oluna bilməyəcəyini deyib.
İdman.Biz xəbər verir ki, Alba "El Larguero" proqramına müsahibəsində Messi və Lamin Yamal arasında aparılan müzakirələrə münasibət bildirib.
O, argentinalının dünya futbolunda bənzəri olmayan bir səviyyədə olduğunu vurğulayıb və Yamalı böyük istedad kimi qiymətləndirib.
Müdafiəçi əlavə edib ki, Hansi Flikin rəhbərliyi altında "Barselona" güclü komanda formalaşdırır və Frenki de Yonq, Pedri kimi adların da bu layihədə böyük rolu var.
Messinin "Spotify Camp Nou"da çəkdirdiyi foto ilə bağlı Alba zarafatla, "stadionun açarı hamıda var", - deyib və bununla bağlı əvvəlcədən məlumatı olmadığını bildirib.
Messinin "Barselona"dan ayrılışına toxunan Alba, bu prosesin argentinalının istədiyi kimi baş tutmadığını söyləyib. O, gələcəkdə Messiyə layiq bir vida mərasiminin keçiriləcəyinə əmin olduğunu vurğulayıb.
Gələcək "Barselona"da president seçkiləri barədə suallardan yayınan Alba, kluba daxil olmaq niyyətinin olmadığını və ailəsi ilə vaxt keçirmək istədiyini bildirib. Eyni zamanda Tiaqo Alkantara ilə birgə rəhbərlik etdiyi "L"Hospitalet" layihəsinin üzərində işləməkdən zövq aldığını qeyd edib.
