Idman.biz
İtaliya millisi pley-off mərhələsində uğursuzluğa düçar olacağı təqdirdə FIFA reytinqinin ilk 20-liyində yer alan komandalar arasında ardıcıl üç mundialı qaçıran ilk yığma olacaq.
İdman.Biz xəbər verir ki, bununla belə, XXI əsrdə top komandaların mundiala vəsiqə qazana bilməməsi nadir hal deyil.
Belə ki, FIFA reytinqinin ilk onluğunda qərarlaşan yığmalar dünya çempionatının seçmə mərhələlərində ümumilikdə altı dəfə uğursuzluq yaşayıb. Bu baxımdan ən yadda qalan fiaskolardan biri 2002-ci ildə dördüncü pillədə qərarlaşan Kolumbiya millisinin mundiala yollana bilməməsi idi.
2018-ci ildə Cənubi Amerika çempionu Çilinin seçmə mərhələdə ilk beşliyə düşə bilməməsi də diqqətdən kənar qalmır.
Qeyd edək ki, noyabrın 16-da 2026-cı ildə keçiriləcək dünya çempionatının seçmə mərhələsi çərçivəsində I qrupunda mübarizəyə yekun vurulub. Lider Norveç "San-Siro"da ikinci pillədəki İtaliyanın qonağı olub. Skandinavlar adlı-sanlı rəqibi onun öz meydanında darmadağın edərək seçmə mərhələni yüzfaizlik nəticə ilə başa vurubular - 1:4. Beləliklə də, Norveç 24 xalla qrup birincisi kimi dünya çempionatının final mərhələsində oynamaq hüququ qazanıb. İkinci pillənin sahibi İtaliya 18 xal toplayaraq pley-off mərhələsinə adlayıb.
Xatırladaq ki, 2026-cı il dünya çempionatına ABŞ, Meksika və Kanada ev sahibliyi edəcək. Yarış 11 iyun - 19 iyul tarixlərində baş tutacaq.
