Idman.biz
İtaliya mediası Bakıda keçirilən və Çempionlar Liqasının əsas mərhələsinin dördüncü turuna təsadüf edən "Qarabağ" - "Çelsi" oyununa geniş yer ayırıb.
İdman.Biz xatırladaq ki, Qurban Qurbanovun komandası ilk hissədə 0:1 hesabı ilə geridə olsa da, fasiləyə qədər hesabı bərabərləşdirib və sonra önə keçib (2:1). İkinci hissədə isə "Zadəganlar" məğlubiyyətdən qaça biliblər (2:2). Beləliklə, "Qarabağ" növbəti görüşünü 25 noyabrda səfərdə "Napoli"yə qarşı keçirəcək.
İtaliyada Bakıda qeydə alınan heç-heçə "Napoli" üçün siqnal kimi dəyərləndirilib. Artıq Azərbaycan çempionu "rahat rəqib" kimi yox, özünə inanan və təhlükəli rəqib kimi qəbul olunur.
"CalcioNapoli24" nəşri nəticəni "Qarabağın qəhrəmanlığı" adlandıraraq yazır ki, "Çelsi"ni dayandıran Qurban Qurbanovun komandası indi "Napoli" ilə həlledici döyüşə hazırlaşır və bu qarşılaşmada "üç həyati vacib xal" uğrunda mübarizə aparacaq.
Nəşr Ağdam klubunun yetkin oyun tərzini xüsusi vurğulayıb:
"Qarabağ" qol buraxdıqdan sonra müdafiəyə çəkilmədi, yüksək pressinq tətbiq etdi, "Çelsi"ni səhvlərə məcbur etdi və sübut etdi ki, aparıcı liqalarda çıxış edən komandalarla bərabər səviyyədə oynaya bilir."
"AreaNapoli" isə hələ oyunun fasiləsində "Napolinin növbəti rəqibi əsl tamaşa göstərir" başlıqlı yazı dərc edib. Məqalədə "Qarabağ"ın 0:1-dən 2:1-ə yüksələn dinamik oyunundan, Bakının atmosferindən və aqressiv futbolundan bəhs edilərək bildirilib ki, bu "Qarabağ" Antonio Kontenin komandası üçün ciddi xəbərdarlıqdır.
"Tuttosport" isə birbaşa müraciətlə yazıb: "Napoli", bax bu "Qarabağ"a - "Çelsi"ni dayandırdı!" Nəşr qeyd edir ki, Azərbaycan çempionu təkcə ingilislərdən xal almaqla kifayətlənməyib, onları "əziyyətə salaraq" həm xarakter, həm də oyun nizam-intizamı nümayiş etdirib.
İtaliya mediası həmçinin "Napoli"nin baş məşqçisi Antonio Kontenin dördüncü turdan əvvəl dediyi sözləri xatırladıb:
"Çempionlar Liqası tamamilə fərqli bir dünyadır. "Qarabağ"ın altı xalı var və bu təsadüfi deyil".
İtalyanlar bu fikri "Qarabağ"ın gücünə sübut kimi gətirərək vurğulayıblar ki, Ağdam təmsilçisi bir daha təzyiq altında soyuqqanlı qalmaq, güclü klublarla mübarizə aparmaq və öz üstünlüklərindən maksimum istifadə etmək bacarığını göstərib.
Artıq İtaliyada 25 noyabrda Neapolda keçiriləcək oyun sadəcə formal qarşılaşma kimi yox, həm "Napoli", həm də gözlənilməz dərəcədə güclü Ağdam təmsilçisi üçün real sınaq kimi dəyərləndirilir.
Qeyd edək ki, Çempionlar Liqasının əsas mərhələsinin dörd turundan sonra "Qarabağ" 7 xalla turnir cədvəlində 15-ci, "Napoli" isə dörd xalla 24-cü yerdə qərarlaşıb.
