İsgəndər Cavadov: Milli komandaya yerli məşqçi lazımdır, əcnəbi yalnız legionerlər çoxluq təşkil etdikdə gətirilə bilər

"Mən həmişə millidə yerli mütəxəssisin çalışmasının tərəfdarı olmuşam. İcraiyyə Komitəsində təmsil olunduğun illərdə dəfələrlə bu məsələni qabardıb, yığmaya yerli məşqçinin dəvət olunmasını təklif etmişəm". Bu sözləri Sport24.az açıqlamasında Regional Futbol Federasiyalıarı İctimai Biriliyinin prezidenti İsgəndər Cavadov deyib. 

"Şöhrət" ordenli veteran futbolçu Ayxan Abbasovun millinin baş məşqçisi təyin olunmasına münasibət bildirib:

"Hər dəfə İcraiyyə Komitəsində (İK) yığmanın baş məşqçisi ilə bağlı məsələ müzakirəyə çıxarılanda yerli mütəxəssislə müqavilə bağlamağı təklif edirdim. İndi bəziləri deyir ki, İsgəndər müəllim İK-da olanda millidə əcnəbilərin işləməsinə səs verib. Sizi əmin edirəm ki, belə olmayıb. Bunu mənimlə bir yerdə olanlar təsdiq edə bilər. Bəzən sözlərimi səhv anlayırlar, barəmdə xoşagəlməz fikirlər sələndirirlər. İsgəndər Cavadov veteran futbolçu, ictimaiyyət arasında tanın şəxs kimi hər zaman ölkə futbolunun inkişafına, yığmanın uğur qazanmasına çalışıb. Hansısa xarici məşqçinin namizədliyi müzakirəyə çıxarılanda deyirdim ki, bizə kənardan mütəxəssis lazım deyil. Heyətin 99 faizi Azərbaycan çempionatında çıxış etdiyi halda əcnəbinin gəlişinin bizə fayda verməyəcəyini izah etməyə çalışırdım. Ancaq çifayda. Səsvermədə heç də hər şey mənim istəyimdən asılı olmurdu. Ayxan Abbasova belə məsuliyyətli postda uğurlar arzulayıram. İnanıram ki, milli onun rəhbərliyi altında bizləri sevindirəcək, əbəs yerə yerli məşqçiyə etimad göstərilmədiyini sübut edəcək".

Cavadov millinin üzvlərinin legioner həyatı yaşamasının vacibliyini də qeyd edib: "İnkişaf etmək, millimizin uğur qazanmasını istəyiriksə, futbolçularımız mütləq şəkildə ölkə xaricinə, Avropanın ən azı ortabab çempionatlarına üz tutmalıdırlar. Qonşu Gürcütanın milisi nəyin hesabına uğur qazanır? Təbii ki, legioner həyatı yaşayan futbolçuların sayəsində. İl ərzində eyni komandalara, eyni futbolçulara qarşı nə qədər oynamaq olar? Legioner həyatı yaşayan oyunçu fərqli futbol mədəniyyəti ilə tanış olur, evdən uzaqda özünü təsdiq etmək üçün var qüvvəsi ilə çalışır. Milliyə bir şərtlə xaricdən məşqçi dəvət etmək olar ki, heç olmasa komandanın yarıdan çoxu legioner həyatı yaşasın, Avropa mentallığı ilə tanış olsun. Onda da orta səviyyəli, yaşı ötmüş biri ilə yox. Müasir futbolun tələblərinə cavab verən mütəxəssis olmalıdır".