Idman.biz
"Qəbələ"nin qanalı müdafiəçisi İsaak Amoahın Futbolinfo.az saytına müsahibəsi
– Misli Premyer Liqasının 2-ci turunda "Zirə" ilə oyuna yaxşı başlayıb hesabı açsanız da, yekunda meydanı xalsız tərk etdiniz (1:2). Hesabda öndə olduğunuz və matça nəzarət etdiyiniz halda, niyə üstünlüyü əldən verərək məğlubiyyətlə üzləşdiniz?
– "Zirə" ilə oyuna güclü başladıq və yaxşı dinamika yaratdıq, amma futbolda kiçik detallar oyunun taleyini dəyişə bilər. Əsas anlarda diqqəti itirdik və rəqib bundan istifadə etdi. Bizim üçün bu vəziyyətlərdən dərs çıxartmaq və növbəti dəfə üstünlüyümüzü daha yaxşı qorumaq vacibdir.
– Sanki məğlubiyyətə aparan yol Eşqin Əhmədovun qolla nəticələnən fərdi səhvindən sonra başladı. Bununla razısınız? Oyundan sonra həmin epizoda görə Eşqinə komanda yoldaşları tərəfindən irad tutuldu, yoxsa dəstək oldunuz?
– Məncə bu, bir futbolçunun səhvi ilə bağlı deyil. Futbolda biz birlikdə qazanırıq və birlikdə uduzuruq. Belə anlar hər bir oyunçunun başına gələ bilər. Təbii ki, komanda olaraq ona dəstəyimizi göstərdik. Əsas məsələ bu cür vəziyyətlərdə komandamızın necə reaksiya verməsi və birlikdə qalmağımızdır. Biz bir-birimizə tam güvənirik.
– İlk 2 turdan sonra "Qəbələ"nin aktivində 1 xal var. Bu nəticə sizi razı salır?
– Əlbəttə, razı deyilik, çünki məqsədimiz daha yüksəkdir. Amma bu, hələ mövsümün başlanğıcıdır. Daha yaxşı oynaya biləcəyimizi anlayırıq və hər gün daha çox çalışırıq ki, oyunlarımız nəticəyə çevrilsin.
– Çempionatın hər iki oyununda xeyli sayda qol epizodu yaratmısınız. Belə olan halda, qələbə qazanmaq üçün komandanızda nə çatışmır?
– Bəli, qol vəziyyətləri yaradırıq, bu da müsbət haldır. Amma çatışmayan cəhət son toxunuşlardır – söhbət qapı qarşısında daha soyuqqanlı olmaqdan və vacib anlarda düzgün qərar verməkdən gedir. Həmçinin müdafiədə daha kompakt olmalıyıq. Bunları yaxşılaşdırsaq, nəticələr də gələcək.
– Növbəti turda "Araz-Naxçıvan"ın qonağı olacaqsınız. Şansları necə dəyərləndirirsiniz?
– "Araz-Naxçıvan"a hörmətlə yanaşırıq, bu komanda xüsusilə evdə çətin rəqibdir. Amma biz də özümüzə və hazırlığımıza güvənirik. Əgər diqqətli olsaq və güclü tərəflərimizi ortaya qoya bilsək, oradan müsbət nəticə ilə dönəcəyimizə inanırıq.
İdman.biz
