İrəliləmək istəyiriksə, güclü komandalarla yarışmalıyıq

Misli Premyer Liqasının XXX turunun "Sumqayıt" – "Şamaxı" oyunundan (1:2) sonra qonaq komandanın baş məşqçisi Ayxan Abbasov jurnalistlərin suallarını cavablandırdı. Sport24.az xəbər verir ki, mütəxəssis əvvəlcə görüşlə bağlı fikirlərini bildirdi…

– Maraqlı oyun oldu. Belə stadionda oynamaq xoşdur. Bura gələ azarkeşlərə təşəkkür edirəm. Vacib qələbə idi. Oyun olaraq da sevinirəm. Hər iki hissədə üstün oynadıq. Rəqibin ilk əks-hücumu qol oldu. Sevinirəm ki, uşaqlar oyundan qopmadı. Qollar vurub, qələbə qazandıq. Vacib xaldır, qarşımıza qoyulan məqsədə çatmaq üçün çalışırıq. Bura gələndə də inanırdım. Bir çox gənc futbolçunu futbolumuza qazandırdıq. Qarşıda vacib oyunlarımız olacaq.

– Fasilədə nəyi dəyişdiniz ki, Qollar gəldi?

– Futbolçulara dedim ki, tempi yüksək saxlayın. Rəqib bunu istəmirdi. İlk hissədə də sürətli hücumlarla epizodlar yaratdıq. Futbolçularım tempi yüksək tuta bildi.

– Sonuncu pillədən kifayət qədər aralısız. Bundan sonrakı əsas rəqiblərinizin "Neftçi" və "Sabah"ı olduğunu deyə bilərik?

– Nəsə demək olmur. Vacib olan uşaqların bu tempi qorumasıdır. İnkişaf istəyiriksə, böyük komandalarla mübarizə aparmalıyıq. Gələcəyimiz üçün oynamalı, məşqlərimizi etməliyik.

– Yeni mövsümdən klublar üçün ayrılan maliyyənin azalacağı gözlənilir. Bu, sizə necə təsir edəcək?

– Real vəziyyətə baxmalıyıq. I Liqadan gələcək klubların sponsorları var. Bizim də tutduğumuz yol var. Bəzən vəziyyəti düzgün təhlil etmirik. Məsələn, nə üçün "Şamaxı"da gənclər oynayır? Qarşımıza məqsəd qoyacağıq. Büdcəyə uyğun davranmağa çalışacağıq. Gənclərə şans verən klubların çox olması uşaqların yolunu açacaq. Gənclər oynamalıdır, komanda sayı çox olsa, oynamaq şansları artacaq. Bizim məqsədimiz var, gələn il də bu yolu davam etdirəcəyik.