Idman.biz
Azərbaycan Futbol Federasiyaları Assosiasiyasının (AFFA) təşəbbüsü və Sosial Xidmətlər Agentliyinin dəstəyi ilə 1 və 2 nömrəli uşaq evlərində futbol məşğələləri davam edir. Layihə yalnız uşaqların fiziki göstəricilərini inkişaf etdirmir, həm də onlara özlərini göstərmək şansı yaradır.
Həftədə iki dəfə uşaq evində məşq keçirən mütəxəssislərdən biri müxtəlif yaş qruplarının "Araz-Naxçıvan" qadın komandalarının məşqçisi İrada Quliyevadır.
O, Sosial Xidmətlər Agentliyinin tabeliyində olan 1 nömrəli uşaq evinin iki yetirməsi – Qənirə Zeynalova və Elza Rəsulzadəni "Araz-Naxçıvan"a dəvət edib.
İdman.Biz-ə danışan İradə Quliyeva hər iki qızın böyük perspektivə malik olduğunu bildirib:
"Xüsusilə Qənirəni qeyd etmək istəyirəm. Onun yaşı 14-dür. Qənirə çox istedadlıdır və artıq indi yığmaya düşmək iddiası qoya bilər. Qənirə əvvəlcə meydan oyunçusu kimi başlamışdı, amma mən gördüm ki, o, topdan qorxmur, çox "döyüşkəndir" və ona qapıçı mövqeyində özünü sınamağı təklif etdim. Yanılmadım - ona bu mövqe çox yaxşı alınır. Elza isə hücumçu mövqeyində çıxış edir".
Quliyeva bildirib ki, hər iki qız uşaq evində məşqləri davam etdirir, lakin onları "Araz-Naxçıvan"ın oyunlarında iştirak etmələri üçün mütəmadi dəvət edirlər.
"Bütün bu uşaqlar - həm qızlar, həm də oğlanlar - tam səmimiyyətlə məşq edirlər. Onlar idmana, xüsusilə futbola həqiqətən maraqlıdırlar. Orada həqiqətən çox istedadlı uşaqlar var. Hər klubda uşaq evlərinin bir-iki yetirməsi oynasa, bu, ölkədə futbolun inkişafına müsbət təsir göstərəcək. Və bu uşaqlar üçün bu, real şansdır", – deyə o vurğulayıb.
Məşqçi əlavə edib ki, belə təşəbbüslər daha çox istedadlı qızları tapmağa kömək edəcək, çünki bəzən onları futbola cəlb etmək asan olmur:
"Bu məsələdə vəziyyət indi əvvəlkindən daha asanlaşıb. Amma hər halda hər valideyn qızını bu idman növü ilə məşğul olmağa razı etmir".
Qadın futbolu mövzusunu davam etdirən İrada Quliyeva qadın məşqçilər məsələsinə də toxunaraq, onların sayının hər il artdığını qeyd edib:
"AFFA məşqçi kursları keçir və onlarda keçmiş futbolçular da daxil olmaqla daha çox qadın iştirak edir. Təbii ki, qadın məşqçi üçün karyerasına sıfırdan başlamaq asan deyil. Amma klublar onları işə götürdükdə yol xeyli asanlaşır. Əgər insan peşəkardırsa, heç bir ayrı-seçkilik olmamalıdır və adətən yoxdur".
Sonda o, futbolçuların çox vaxt qadın məşqçilərlə işləməyin daha rahat olduğunu bildirib:
"Kişi məşqçiləri incitmək istəmirəm, amma məncə qızlar üçün qadın məşqçilərlə işləmək daha asandır. Utancaqlıq amili var – hər qız müəyyən məqamlardan kişi məşqçi ilə açıq danışa bilmir. Azərbaycanda indi çox vaxt kişi baş məşqçi yanında ikinci məşqçi və ya həkim kimi qadın cəlb etməyə çalışırlar. Sovet dövründə komandada yalnız kişilər çalışırdı və şəxsi nələrsə paylaşa bilirdiksə, yalnız kapitanla. İndi "Araz-Naxçıvan"da mənim tamamilə qadın kollektivi var: administrator, həkim, masajist - hamısı qadındır. Mən belə daha rahatam".
