Sport24.az
"Komandamız vacib qələbə qazandı. Qələbəyə hava-su kimi ehtiyacımız var idi. Düşünürəm ki, bu 3 xal həm toparlanmaq baxımından vacib idi, həm də qarşıdakı oyunlar üçün motivasiya olacaq". Bu sözləri Sport24.az-a açıqlamasında "Sabah"ın Müşahidə Şurasının üzvü və idman direktoru İqor Ponomaryov deyib.
Olimpiya çempionu Konfrans Liqasında "Sent Patriksə" hər iki oyunda məğlubiyyəti bəxtsizlik adlandırmaqla yanaşı, azarkeşlərin "Neftçi" - "Sabah" qarşılaşmasından zövq aldığını da vurğulamağı unutmadı: "Əlbəttə ki, avrokuboklarda maksimum irəli getmək istəyirdik. İrlandlara qarşı hər iki qarşılaşmada, xüsusilə də Masazırda baş tutan görüşdə pis oynamadıq. Sadəcə, futbolçumuzun qırmızı vərəqə alması oyun planına təsirsiz ötüşmədi. Hər iki matçda futbolçumuzun meydandan qovulmasını və minimal hesablı məğlubiyyətləri bəxtsizlik, şanssızlıq adlandırardım. Amma olan oldu. Həyatda acılı-şirinli günlər olduğu kimi futbolda da eynidi. Yenilgidən dərs çıxarmaq və irəli baxmaq lazımdı. "Sent Patriks"ə məğlubiyyətdən sonra komandanı toparlamaq lazım idi. Sevindirici haldı ki, bütün neqativləri geridə qoyub "Neftçi" ilə oyunu futbolçularımız yaxşı keçirdi. Ehtiyatlı, ağıllı, təmkinli oynayıb qələbə qazandıq. Fikrimcə, maraqlı Bakı derbisi alındı və azarkeşlər 90 dəqiqədən zövq aldı".
Qeyd edək ki, Premyer Liqanın III turu çərçivəsində baş tutan "Neftçi" - Zirə" qarşılaşması qonaqların qələbəsi (0:2) ilə yekunlaşıb.
ABDULLA İSMAYILOĞLU
