Idman.biz
"Messi komandadan bir qədər ayrı yaşayır".
İdman.biz xəbər verir ki, bu sözləri "İnter Mayami"nin 18 yaşlı qapıçısı Dmitri Torubara komandanın əsas ulduzlarının davranışları barədə danışarkən deyib.
ABŞ klubunun akademiyasında çıxış edən ukraynalı qolkiper Тribuna.com saytına müsahibə verib: "Məsələn, Buskets – ümumilikdə daha qapalı biridir. Amma mehribandır, səmimidir, səhər yeməyində və naharda həmişə salamlaşır. Onların hamısı tərbiyəlidirlər, və heç vaxt belə bir şey hiss etmərsən ki, kimsə düşünər: "Mən "Barselona"da oynamışam, sizdən üstünəm". Onlar komanda ruhunu saxlayırlar və gənc oyunçulara qarşı münasibətləri normaldır. Deyə bilmərəm ki, ən yaxın dostlarıq, amma həmişə salamlaşırlar, söhbət edirlər. Onlardan heç biri "başqa planetdən olan" ulduz kimi hiss olunmur.
Jordi Alba isə komandanın ürəyidir. O, həm gənclərlə, həm böyüklərlə, həm də amerikalılarla zarafatlaşır, məşqlərdən sonra qalır. Bir sözlə, kollektivin ürəyidir".
Bəs Lionel Messi? "Yəqin ki, artıq müsahibələrdən də eşitmisiniz, o, hələ "Barselona"da olarkən də olduqca qapalı biri olub. Klubda nə səhər yeməyi yeyir, nə də nahar edir, öz şəxsi həkimi, fizioterapevti var, yəni komandadan bir qədər ayrı yaşayır. Amma məşqlərdə tam şəkildə hər kəslə birlikdə çalışır, ünsiyyət qurur, çox tərbiyəlidir. Necə desəm… Elə olmur ki, kiminləsə salamlaşmasın və ya kobud davransın. Hamısı çox mehribandır. Heç bir üstünlük hiss olunmur.
Messi şəkil çəkdirməyə çox sakit yanaşır. Onun kiməsə yox dediyini heç vaxt görməmişəm. Ətrafında bir milyon mühafizəçi qaçışmır. Aydındır ki, yanında həmişə həmin o ciddi cangüdən olur – yəqin siz də onu görmüsünüz. O, kifayət qədər məşhurdur. Deyəsən, bütün klub ondan qorxur (gülür). Ona baxanda fikirləşirsən: "Görəsən, yaxınlaşmağa dəyər, ya yox?"
Messi yeni gələndə klubda bizə dərhal dedilər: ‘Bura onun iş yeridir. Onsuz da evinin qarşısında, stadionda kifayət qədər fanatı gözləyir, ona görə sizdə ondan şəkil çəkdirməyi istəməyin". Amma… bu, çətin məsələdir. Messi iki metr aralıda olanda – ondan şəkil istəməmək mümkün deyil. Bu artıq bir refleksdir. Mən də, əlbəttə, nəzakətlə xahiş etdim və o da razılaşdı".
İdman.biz
