Idman.biz
"İnter Mayami" klubu Lionel Messinin karyerasında hələ yaşamadığı bir arzunu reallaşdırmaq üçün hərəkətə keçib.
İdman.Biz xəbər verir ki, klubun sahibi Xorxe Mas mətbuat konfransında "Kopa Libertadores"də iştirak ehtimalı ilə bağlı açıqlama verib. Onun sözlərinə görə, "İnter Mayami" bu məsələ ilə bağlı Cənubi Amerika Futbol Konfederasiyası ilə danışıqlar aparır.
Xorxe Mas bildirib ki, Messinin futbol karyerasında demək olar ki, hər şeyi qazanmasına baxmayaraq, Libertadoresdə oynamaq və qalib gəlmək hələ də reallaşmayan nadir arzulardan biridir. Klub rəhbəri xatırladıb ki, bir neçə il əvvəl Meksika klubları da Libertadoresdə iştirak edib və bu presedent MLS komandaları üçün də imkan yarada bilər.
Masın fikrincə, həm MLS, həm də Meksikanın Liqa MX çempionları bu turnirdə iştirak etməyə layiqdir. O hesab edir ki, belə bir addım Libertadoresi daha genişmiqyaslı və cəlbedici edər.
Digər tərəfdən, Lionel Messinin adı başqa layihələrlə də hallanır. Onun keçmiş komanda yoldaşı, hazırda "Kings League" layihəsinin rəhbəri olan Jerard Pike argentinalı ulduzu bu turnirdə görmək istədiyini açıqlayıb. Pike Messinin iştirakını xəyal adlandıraraq, onun futbol tarixinin ən yaxşısı olduğunu vurğulayıb.
Beləliklə, "İnter Mayami"nin planları gerçəkləşərsə, Lionel Messi karyerasında ilk dəfə Libertadoresdə çıxış edərək futbol dünyasında növbəti tarixi səhifə aça bilər.
