İngiltərə Premyer Liqasında "Mançester Siti" 3-cü yerə qalxıb

İngiltərə Premyer Liqasının 35-ci turunda "Mançester Siti" "Vulverhempton"u qəbul edib.

"Report" xəbər verir ki, baş hakim Piter Benksin idarə etdiyi matç "Siti of Mançester Stedium"da baş tutub.

Kəsərli hücumlarla fərqlənməyən matçda cəmi bir qol vurulub: 35-ci dəqiqədə "şəhərlilər"in belçikalı yarımmüdafiəçisi Kevin De Bröyne yerlisi Ceremi Dokunun ötürməsindən maksimum yararlanıb – 1:0. Oyunun qalan hissəsi isə Xosep Qvardiolanın yetirmələrinin nəzarəti altında keçib.

Beləliklə, "Mançester Siti" mövsümün bitməsinə üç həftə qalmış turnir cədvəlində üçüncü pilləyə yüksələrək Çempionlar Liqasına vəsiqə qazandıran ilk beşlikdəki yerini bərkidib. "Siti"nin ən yaxın təqibçiləri ehtiyatlarında bir oyun olan "Nyukasl" (62 xal), "Çelsi" (60) və "Nottinhem Forest"dir (60). Eyni zamanda, "şəhərlilər"i "Arsenal"dan (ehtiyatında bir oyun var) cəmi üç xal ayırır. Turnir cədvəlinin lideri isə "Liverpul"dur. "Qırmızılar" hələ ötən tur çempionluqlarını rəsmiləşdiriblər.

Xatırladaq ki, növbəti mövsüm İngiltərə Premyer Liqasının azı beş komandası Çempionlar Liqasına (ÇL) vəsiqə qazanacaq. Belə ki, "Arsenal"ın Londonda "Real" üzərində ÇL-in 1/4 final mərhələsinin ilk oyununda qazandığı 3:0 hesablı qələbədən sonra İngiltərənin növbəti mövsüm bu turnirdə minimum beş komanda ilə təmsil olunması təmin edilib. Bundan başqa, Avropa Liqasının finalının biraddımlığında olan "Mançester Yunayted" və "Tottenhem"in bu turnirdəki qalibiyyəti də İngiltərə komandanları üçün əlavə bir yer açacaq.