Report.az
İngiltərə Premyer Liqasının 32-ci turu çərçivəsində "Liverpul" Londonun "Vest Hem"ini qəbul edib.
"Report" xəbər verir ki, baş hakim Endrü Medlinin idarə etdiyi matç "Enfild"də baş tutub.
Ötən tur 204 günlük aradan sonra Premyer Liqada məğlub olan "qırmızılar" "çəkicdöyənlər"lə oyuna çoxsaylı hücumlarla başlayıblar. Bunun nəticəsində matçın 16-cı dəqiqəsində misirli vinger Məhəmməd Salahın ötürməsindən sonra ekvadorlu Luis Dias topu tora qovuşdurub. Arne Slotun komandası təzyiqi sürdürsə də, ilk yarıda başqa qol vurulmayıb.
İkinci hissənin ortalarına doğru təşəbbüsü ələ alan "Vest Hem"in hesabı bərabərləşdirmək üçün bir neçə fürsəti olsa da, qonaqlar buna nacaq avtoqol sayəsində nail olublar: 86-cı dəqiqədə müdafiəçilər Vircil van Dayk və Endrü Robertsonun inamsız oyunu nəticəsində ikinciyə toxunan top Alissonun qoruduğu qapıya daxil olub – 1:1. Bununla belə, Qrem Potterin yetirmələrinin sevinci çox çəkməyib. Üç dəqiqə sonra Vircil van Dayk argentinalı yarımmüdafiəçi Aleksis Makallisterin künc ötürməsindən "qırmızlar"ın ikinci qoluna imza atıb və oyunda son nöqtəni qoyub: "Liverpul" – 2, "Vest Hem" – 1.
Beləliklə, 76-cı xalını toplayan "Liverpul"u çempionluğunun rəsmiləşməsindən cəmi iki qələbə (6 xal) ayırır. Onun ən yaxın təqibçisi "Arsenal"dır – 63 xal. "Vest Hem" isə 25 xalla 17-ci pillədə qalıb. Komandanı liqadan düşmə zonasından – 18-ci pillədən 14 xal ayırır.
Qeyd edək ki, İngiltərə Premyer Liqası 38 turdan ibarətdir. Çempionata mayın 25-də yekun vurulacaq.
