Idman.biz
İngiltərə Premyer Liqasının XI turu bu həftə keçiriləcək və qarşılaşmalar turnir cədvəlinin yuxarı sıralarındakı vəziyyətə ciddi təsir göstərə bilər.
İdman.Biz xəbər verir ki, oyunlar bu il milli komandaların oyunları üçün nəzərdə tutulan son fasilədən öncə baş tutacaq.
"Tottenhem" - "Mançester Yunayted" (8 noyabr)
London təmsilçisi hazırda altıncı yerdədir və 17 xal toplayıb. Eyni göstəriciyə malik "Mançester Yunayted" isə səkkizinci pillədə qərarlaşıb. Hər iki komanda zirvədən eyni məsafədədir və bu oyundakı nəticə onların mövsüm taleyini dəyişə bilər.
Tomas Frankın komandası sabit çıxış etməsə də, güclü rəqiblərlə matçlarda rəqabət qabiliyyətini qoruyur. Son mövsümlərdə "Mançester Yunayted"ə qarşı uğurlu seriyaya malikdir. Əsas problem hücum xəttindədir - Məhəmməd Kudusun, Dominik Solankenin və bir neçə oyunçunun zədəsi səbəbindən matçı buraxması mümkündür. Djed Spens artıq sıraya dönüb, müdafiə və yarımmüdafiənin böyük hissəsi hazır vəziyyətdədir ki, bu da evdə aqressiv oyun üslubunun davamına şərait yaradır.
Ruben Amorimin rəhbərliyi altında "Mançester Yunayted" son vaxtlar daha inamlı təsir bağışlayır. Komanda məğlubiyyətsiz seriya yaşayır, hücum xətti daha əlaqəli oynayır. Şeşko və Mbeumo formaya düşür, Bruno Fernandes isə daha dərin mövqedə çıxış edərək oyunun mərkəzinə nəzarəti artırıb. Lisandro Martinesin qayıdışı gözlənilsə də, bu, yəqin ki, fasilədən sonra baş verəcək.
Matç hər iki komandanın dözümlülüyünü və heyət dərinliyini yoxlayacaq. Qalib Çempionlar Liqasına vəsiqə uğrunda mövqeyini gücləndirəcək, məğlub olan isə fasiləyə təzyiq altında yollanacaq.
"Sanderlend" - "Arsenal" (8 noyabr)
Turların əsas intriqalarından biri - liderlə mövsümün sürpriz komandasının qarşıdurması. Premyer Liqaya yenidən qayıdan "Sanderlend" mövsümün sensasiyası kimi dəyərləndirilir: 10 turdan sonra 4-cü yer və 18 xal. Bu, Premyer Liqa tarixində debütant üçün ən yaxşı seriyalardan biridir.
Rejis Le Brinin komandası ev oyunlarında intizamlı çıxış edir, Qranit Caka oyunun idarəsində əsas rol oynayır. Əsas itkisi müdafiəçi Omar Alderetedir.
Lider "Arsenal" 25 xalla birinci pillədədir və 10 turda cəmi üç qol buraxmaqla liqanın ən etibarlı müdafiəsinə sahibdir. Lakin hücum xətti böhran yaşayır - eyni vaxtda üç mərkəz hücumçusu (Xesus, Haverz, Yokereş), həmçinin Martinelli və Edeqor zədəlidir. Maduekenin durumu da sual altındadır. Mikael Arteta "yalançı doqquz" rolunda Mikel Merinonu sınamağı düşünür, Zubimendi isə dayaq zonasına qayıdır.
Bu qarşılaşma "Arsenal" üçün payızın ən çətin səfəri ola bilər – həm təşkilatlanmış, həm də emosional "Sanderlend" üçün bu, mövsümün oyunu sayılır.
"Mançester Siti" - "Liverpul" (9 noyabr)
Turun əsas oyunu və titul mübarizəsində mümkün dönüş nöqtəsi. Pep Qvardiolanın komandası son həftələrdə sabit formadadır və görüşə optimal vəziyyətdə gəlir. Erlinq Haland tam hazırdır, Fil Foden əla formada çıxış edir. Rodrinin iştirakı sual altındadır, lakin ehtiyatla yanaşılır. Ümumilikdə, heyət demək olar ki, ideal səviyyədədir.
Mövcud çempion uğursuz seriyadan sonra həm Premyer Liqada, həm də Çempionlar Liqasında qazandığı qələbələrlə özünə inamı bərpa edib. Amma problemlər qalır - səfər oyunlarındakı zəif nəticələr, müdafiə xəttində və qapıçı Alissonun durumundakı çətinliklər, habelə İsakın oynamasının sual altında olması.
Bu oyunda "Mançester Siti"nin qələbəsi "Arsenal"ı təzyiq altına salacaq, "Liverpul"un qələbəsi isə turnir cədvəlinin zirvəsində üçlü mübarizəni yenidən bərpa edəcək. Gözlənilir ki, qarşılaşma sürətli tempdə və minimum ehtiyatlılıqla keçəcək.
11-ci turun digər oyunları:
"Everton" - "Fulhem" (8 noyabr)
"Vest Hem" - "Bernli" (8 noyabr)
"Çelsi" - "Vulverhempton" (8 noyabr)
"Aston Villa" - "Bornmut" (9 noyabr)
"Brentford" - "Nyukasl" (9 noyabr)
"Kristal Palas" - "Brayton" (9 noyabr)
"Nottingem Forest" - "Lids" (9 noyabr)
Premyer Liqanın 11-ci tur öncəsi turnir cədvəli:
"Arsenal" - 25 xal
"Mançester Siti" - 19 xal
"Liverpul" - 18 xal
"Sanderlend" -18 xal
"Bornmut" - 18 xal
"Tottenhem" - 17 xal
"Çelsi" - 17 xal
"Mançester Yunayted" - 17 xal
"Kristal Pelas" - 16 xal
"Brayton" - 15 xal
"Aston Villa" - 15 xal
"Brentford" - 13 xal
"Nyukasl" - 12 xal
"Everton" - 12 xal
"Fulhem" - 11 xal
"Lids" - 11 xal
"Bernli" - 10 xal
"Vest Hem" - 7 xal
"Nottingem Forest" - 6 xal
"Vulverhempton" - 2 xal
Teymur Tuşiyev
