Idman.biz
Bu həftəsonu dünyanın ən güclü futbol liqası olan İngiltərə Premyer Liqasında X turun görüşləri baş tutacaq.
İdman.Biz-in məlumatına görə, IX turdan sonra "Arsenal" bir qədər irəliləyərək liderliyini qoruyub və ümumilikdə Artetanın komandası hələlik ən sabit təsir bağışlayan kollektivdir.
Bununla belə, yaxın izləyicilər çox uzaqda deyil və "topçular"ın istənilən uğursuzluğu rahat üstünlüyün itirilməsinə gətirib çıxara bilər.
"Tottenhem" - "Çelsi" (1 noyabr)
London derbisi Bakı ab-havasında keçəcək: "Çelsi" artıq 5 noyabrda Çempionlar Liqasında "Qarabağ"la oyuna görə Bakıya gələcək. Buna görə də "Tottenhem Hotspur Stadium"dakı matç "zadəganlar" üçün Tofiq Bəhramov stadionunda oyun ərəfəsi ümumi sınaq xarakteri daşıyır.
Tomas Frankın komandası həftəiçi Liqa Kubokundan kənarlaşdırılıb və baş məşqçi sıx oyun təqvimindən açıq şəkildə şikayətlənib, lakin "Çelsi"yə qarşı ilk dəqiqələrdən fəal oynamalı olduqlarını bildirib. "Totenhem" müdafiə baxımından müsbət xəbərlərlə diqqət çəkir - Kristian Romero və Destini Udoci artıq komandaya dönüblər.
"Çelsi"də isə yeni gərginlik yaşanır: Liqa Kubokunda "Vulverhempton"la 4:3 hesablı gərgin oyundan sonra baş məşqçi Enso Mareska Liam Delapın meydandan qovulmasını "çox axmaq hərəkət" adlandırıb və fasilədən sonra komandasının əsəbi oyununa görə narazılığını bildirib. Bu, Bakıdakı qarşılaşma öncəsi vacib siqnaldır - məşqçinin özü etiraf edib ki, futbolçular 3:0 öndə olsalar da, "panikaya düşüblər". Deməli, "zadəganlar"ın oyununda müəyyən inamsızlıq hiss olunur və "Tottenhem"lə qarşılaşma onun təsadüfi hal, yoxsa sistemli problem olub-olmadığını göstərəcək.
"Mançester Siti" – "Bornmut" (2 noyabr)
X turun qarşılaşması öncəsi "şəhərlilər"in baş məşqçisi Pep Qvardiola Erlinq Halandın oynamağa hazır olduğunu, Rodrinin isə bud əzələsindəki zədədən sonra heyətə qayıda biləcəyini təsdiqləyib. Bu, artıq səkkiz turdur məğlub olmayan Andoni İraolanın komandası qarşısında güc balansını ciddi şəkildə dəyişir.
İndiki "Bornmut" müdafiədə dərindən oynamır, dalğavari pressinq tətbiq edir və İraolanın "təşkil olunmuş xaos" adlandırdığı sistemdə oynayır. Bu, baş məşqçinin "Rayo Valyekano"dakı dövründən bəri ən aqressiv oyun planlarından biridir və hazırda turnir cədvəlindəki ikinci yer tamamilə haqlı görünür.
"Liverpul" – "Aston Villa" (2 noyabr)
Hazırkı çempion ağır dönəmdən keçir: "Liverpul" İngiltərə Premyer Liqasında ardıcıl dörd oyundur uduzur və bütün turnirlər üzrə son səkkiz matçın altısında məğlub olub. Arne Slot matçdan əvvəl komandanın hücum futbolundan imtina etməyəcəyini bildirib, amma təzyiq və heyət problemlərini etiraf edib. "Qırmızılar"da Rayan Qravenberxin qayıtması mümkündür, lakin bir neçə futbolçu hələ də zədəlidir.
Əksinə, Una Emrinin komandası yüksəlişdədir: "Aston Villa" Premyer Liqada ardıcıl dörd qələbə qazanıb və "Enfild"ə yaxşı forma və topsuz oyunda yüksək intizamla gəlir.
Turun digər oyunları:
"Brayton" – "Lids" (1 noyabr)
"Bernli" – "Arsenal" (1 noyabr)
"Kristal Pelas" – "Brentford" (1 noyabr)
"Fulhem" – "Vulverhempton" (1 noyabr)
"Nottinqem Forest" – "Mançester Yunayted" (1 noyabr)
"Vest Hem" – "Nyukasl" (2 noyabr)
"Sanderlend" – "Everton" (3 noyabr)
Turnir cədvəli:
"Arsenal" – 22
"Bornmut" – 18
"Tottenhem" – 17
"Sanderlend" – 17
"Mançester Siti" – 16
"Mançester Yunayted" – 16
"Liverpul" – 15
"Aston Villa" – 15
"Çelsi" – 14
"Kristal Pelas" – 13
"Brentford" – 13
"Nyukasl Yunayted" – 12
"Brayton" – 12
"Everton" – 11
"Lids" – 11
"Bernli" – 10
"Fulhem" – 8
"Nottingem Forest" – 5
"Vest Hem" – 4
"Vulverhempton" – 2
Teymur Tuşiyev
