Report.az
İngiltərə Premyer Liqası XV turunda "Everton" "Liverpul"u qəbul edib.
"Report" xəbər verir ki, baş hakim Maykl Oliverin idarə etdiyi matç "Qudison Park"da baş tutub.
Növbəti mövsümü yeni meydanda – "Everton Stedium"da keçirəcək "mavilər" üçün "Qudison Park"dakı son Mersisayd derbisi xüsusilə əlamətdar olub. Oyunda hesabı Devid Moyesin yetirmələri açıb: 11-ci dəqiqədə Beto Carred Brantueytin ötürməsindən maksimum yararlanıb. Lakin ev sahiblərinin sevinci çox çəkməyib: cəmi beş dəqiqə sonra Aleksis Mak Allister Məhəmməd Salahın dəqiq ötürməsindən sonra topu başla Pikfordun qoruduğu qapıya göndərib. Bərabər mübarizə şəraitində keçən birinci hissədə başqa qol qeydə alınmayıb – 1:1. Kobud oyunla yadda qalan ilk yarıda Oliver ümumilikdə beş dəfə əlini cibinə atıb.
Oyunun ikinci hissəsində, 73-cü dəqiqədə, "qırmızılar"ın bombardiri Salah komandasının hücumunu məntiqi sonluğa çatdırıb – 1:2. Bununla belə, təzyiqi artıran "mavilər" əlavə edilmiş 8-ci dəqiqədə istəklərinə nail olublar: Ceyms Tarkovski tarazlığı bərpa edərək yekun hesabı müəyyənləşdirib – 2:2.
Oyundan sonra futbolçular arasında qarşıdurma baş verib. "Everton"dan Abdulay Dukure, "Liverpul"dan isə Körtis Cons ikinci dəfə xəbərdarlıq edilərək qırmızı vərəqə alıblar. Bundan başqa, baş hakim "qırmızılar"ın baş məşqçisi Arne Slota da qırmızı vərəqə göstərib.
Qeyd edək ki, hələ ötən ilin dekabrında keçirilməli olan bu matç əlverişsiz hava şəraiti ilə əlaqədar ertələnmişdi.
Beləliklə, 24 oyundan sonra "Liverpul"un 57 xalı var. Çempionatın şəriksiz liderinin ən yaxın təqibçisi 50 xala malik "Arsenal"dır.
"Everton" isə eyni sayda oyundan sonra 27 xala malikdir və bu heç-heçə ilə 15-ci pilləyə yüksəlib.
