Idman.biz
Futbol üzrə İngiltərə Premyer Liqasında 23-cü tura start verilir və bu mərhələyə mövsüm turnir cədvəlinin iki qütbündə aydın görünən intriqa ilə daxil olur.
İdman.Biz xəbər verir ki, yuxarı pillələrdə liderliyi qoruyan "Arsenal" kiçik fərq yarada bilib, arxada isə bir neçə komanda avrokuboklara vəsiqə uğrunda gərgin mübarizəni davam etdirir. Aşağı pillələrdə isə hər turla birlikdə qalmaq uğrunda mübarizə daha da kəskinləşir və istənilən xal itkisi həlledici ola bilər.
"Arsenal" – "Mançester Yunayted" (25 yanvar)
Turun mərkəzi qarşılaşması Londonda baş tutacaq. Çempionatın lideri "Arsenal" doğma meydanda "Mançester Yunayted"i qəbul edəcək. Mikel Artetanın komandası 22 oyundan sonra 50 xalla turnir cədvəlinə başçılıq edir, "mankunianlar" isə 35 xalla beşinci pillədə qərarlaşıb.
"Mançester Yunayted" bu oyuna yüksək əhval-ruhiyyə ilə çıxacaq. Belə ki, ötən turda Maykl Kerrikin rəhbərlik etdiyi kollektiv "Mançester Siti"ni 2:0 hesabı ilə məğlub edib. Bu qələbə komanda üçün mühüm emosional impuls olmaqla yanaşı, "Old Trafford"da baş məşqçi dəyişikliyindən sonra yüksəlişin başladığını göstərən əsas siqnallardan biri kimi dəyərləndirilir. Məhz bu nəticə "Arsenal"ın ən yaxın izləyiciləri ilə fərqi yeddi xala çatdırmasına da şərait yaradıb.
Oyun ərəfəsi açıqlamalarında Arteta avqust ayında baş tutan və "Arsenal"ın 1:0 hesablı qələbəsi ilə yekunlaşan görüşlə müqayisədə bu dəfə tam fərqli futbol gözlədiyini bildirib. London klubunun çalışdırıcısı vurğulayıb ki, rəqib daha intensiv oynayır və enerji baxımından irəliləyiş var. Bu da turnir cədvəlində lider mövqeyinə baxmayaraq, qarşılaşmanın asan olmayacağını göstərir.
"Arsenal"da heyətlə bağlı vəziyyət ümumilikdə müsbət qiymətləndirilir. Müdafiəçilər Rikkardo Kalafiori və Pyero İnkapiye məşqlərə qayıdıblar. Yeganə dəqiq itki gənc futbolçu Maks Douman hesab olunur. Arteta həmçinin Kay Havertsin də sıraya qayıtmağa yaxın olduğunu və yaxın həftələrdə oyun praktikasına cəlb oluna biləcəyini qeyd edib.
"Mançester Yunayted"də isə Kerrik "Emirates" stadionuna səfər ərəfəsində komandanın derbidən sonra yaxşı durumda olduğunu və "Siti" ilə oyunun yeni problemlərsiz başa çatdığını bildirib. Bununla belə, Matteys de Liqtin qarşılaşmanı buraxacağı dəqiqdir. Hücumçu Coşua Zirkze isə zədə səbəbindən əvvəlki oyunda iştirak etməyib və onun durumu hələ də sual altındadır. Eyni zamanda Afrika Millətlər Kubokunda iştirak edən Nussair Mazraouinin qayıdışı da mümkündür.
APL-də 23-cü turun digər oyunları:
24 yanvar
"Vest Hem" – "Sanderlend"
"Bernli" – "Tottenhem"
"Fulhem" – "Brayton"
"Mançester Siti" – "Vulverhempton"
"Bornmut" – "Liverpul"
25 yanvar
"Brentford" – "Nottingem Forest"
"Kristal Pelas" – "Çelsi"
"Nyukasl" – "Aston Villa"
26 yanvar
"Everton" – "Lids"
Hazırkı vəziyyətə görə APL-in turnir cədvəli:
"Arsenal" – 50
"Mançester Siti" – 43
"Aston Villa" – 43
"Liverpul" – 36
"Mançester Yunayted" – 35
"Çelsi" – 34
"Brentford" – 33
"Nyukasl" – 33
"Sanderlend" – 33
"Everton" – 32
"Fulhem" – 31
"Brayton" – 30
"Kristal Pelas" – 28
"Tottenhem" – 27
"Bornmut" – 27
"Lids" – 25
"Nottingem Forest" – 22
"Vest Hem" – 17
"Bernli" – 14
"Vulverhempton" – 8
