Report.az
İngiltərə Premyer Liqasının 19-cu turunda "Brentford" "Arsenal"ı qəbul edib.
"Report" xəbər verir ki, "Brentford Kommyuniti" stadionunda baş tutmuş oyunu baş hakim Piter Benks idarə edib.
Matçda hesabı ev sahibləri açıblar: 13-cü dəqiqədə kamerunlu qoleador Brian Mbömo fərqlənib. "Topçular"ın cavabı isə 29-cu dəqiqəyə təsadüf edib: Qabriel Jezus "arılar"ın qapıçısı Mark Flekkeni məyus edərək status-kvonu bərpa edib.
İkinci hissəyə Mikel Artetanın yetirmələri daha fəal başlayıb. 50-ci dəqiqədə Mikel Merino londonluların ikinci qoluna imza atıb. Qonaqların növbəti qolu da özünü çox gözlətməyib: cəmi üç dəqiqədə sonra Qabriel Martinelli komandasının üçüncü qolunu vuraraq yekun hesabı müəyyənləşdirib: "Brentford" – 1, "Arsenal" – 3.
Beləliklə, 19 turdan sonra 39 xala malik "Arsenal" ikinci pillədə qərarlaşıb. Onun ən yaxın təqibçiləri "Nottingem Forest" (37) və "Çelsi"dir (35).
Danimarkalı mütəxəssis Tomas Frankın yetirmələrinin isə 24 xalı var. Məğlubiyyətə baxmayaraq, "arılar" 12-ci pilləki yerlərini qoruyublar. "Brentford"un ən yaxın təqibçiləri isə "Vest Hem" (23) və "Mançester Yunayted"dir (22).
Turnir cədvəlinin şəriksiz lideri isə Arne Slotun başçılıq etdiyi "Liverpul"dur (45). Bundan başqa, Mersisayd təmsilçisinin ehtiyatında bir oyun var.
