Idman.biz
Premyer Liqanın debütantı olan "İmişli"nin ev oyunlarını Quba Olimpiya İdman Kompleksinin stadionunda keçirəcəyi gözlənilirdi. Lakin PFL tərəfindən çıxarılan qərara əsasn "İmişli"nin ilk 2 ev oyunu Şamaxıda baş tutacaq.
İdman.biz xəbər verir ki, məsələyə aydınlıq gətirmək üçün sportal.az saytı PFL-in Texniki İdman şöbəsinin direktoru Elgiz Abbasovla əlaqə saxlayıb.
Abbasov açıqlamasında bildirdi ki, hələ bir ay əvvəldən "İmişli"yə çatışmazlıqlar barədə bildiriş olub: "2025/26 mövsümünün startı tarixindən 30 gün öncə - 16.07.2025-ci il tarixində "İmişli" Futbol Klubundan PFL-in rəsmi elektron poçt ünvanına müraciət daxil olub və komandanın ev oyunlarını keçirməsi üçün Quba Olimpiya İdman Kompleksinin stadionununun təftiş edilməsi xahiş edilib. Bunun əsasında 25.07.2025-ci il tarixində PFL tərəfindən sözügedən stadiona baxış həyata keçirilib. Klub rəhbərliyinin də iştirak etdiyi təftiş prosesi zamanı yerində çatışmazlıqlar barədə məlumat verilib, eyni zamanda həll yolları təklif olunub. Təftişin nəticələri barədə 28.07.2025-ci il tarixində "İmişli" klubunun elektron poçt ünvanına təqdimat göndərilib və avqustun 8-nə qədər qeyd olunan çatışmazlıqların aradan qaldırılmasının vacibliyi vurğulanıb.
Lakin keçən müddət ərzində cəhdlərə baxmayaraq, stadionla klub arasında imzalanmış rəsmi müqavilə təqdim olunmayıb, eləcə də, klub tərəfindən çatışmazlıqların aradan qaldırılması ilə bağlı faktiki addımlar atılmayıb. 2025-2026-cı illər mövsümü Azərbaycan Premyer Liqası, Azərbaycan Kuboku, Əvəzedicilər Liqası və I Liqa yarışlarının Əsasnaməsinin 9-cu maddəsinin 1-ci bəndinə əsasən, təqdim edilən stadionda çatışmazlıqlar aradan qaldırılmadəğı üçün klubun ev oyunlarını keçirəcəyi stadion Peşəkar Futbol Liqası tərəfindən müəyyən edilib. Mövsümün startına 1 həftə qalmış - 08.08.2025-ci il tarixində kluba Premyer Liqa çərçivəsində ilk 2 ev oyununu Şamaxı şəhər stadionunda keçirəcəyi ilə bağlı kluba rəsmi məlumat göndərilib".
İdman.biz
