"İmişli" "Qarabağ"dan Hikmət Cəbrayılzadəni icarəyə götürmək istəyir

"İmişli" rəhbərliyi "Qarabağ"a müraciət edib.

İdman.Biz xəbər verir ki, bu barədə aran təmsilçisi sportinfo.az saytına bildirib.

Hikmət Cəbrayılzadə ilə bağlı danışıqlar başlayıb və Premyer Liqanın debütantı 18 yaşlı gənci icarəyə götürməyi qarşısına məqsəd qoyub.

Elitada ilk mövsümünü keçirən klubun rəhbərliyi öz istəyi ilə qarşı tərəfi tanış edib - onlar yarımmüdafiəçi ilə 1,5 illik müqavilə bağlamaq niyyətindədir.

Ağdam təmsilçisi hələlik "İmişli"nin müraciətinə münasibət bildirməyib. Çünki Qurban Qurbanovun reaksiyasını gözləyirlər.

Hikmət bir ildən artıqdır əsas komandanın sıralarındadır. Baş məşqçi ona həm Çempionlar Liqasının təsnifat mərhələsində, həm də Premyer Liqanın bəzi oyunlarında meydana çıxmaq imkanı yaradıb.

Ötən mövsümün 35-ci turunda, "Kəpəz"lə qarşılaşmada "Qarabağ"ın əsas komandasında debüt edən 18 yaşlı yarımmüdafiəçi Qurban Qurbanovun etimadını qazana bilmişdi.

Təcrübəli çalışdırıcı Hikmətin potensialına bələd olduğundan onu yay təlim-məşq toplanışına cəlb etmiş, Çempionlar Liqasının (ÇL) üçüncü təsnifat mərhələsinin "Şkendiya" ilə Bakıdakı görüşündə meydana buraxmışdı.

Daha sonra Premyer Liqanın ikinci turunda "Sumqayıt", üçüncü turunda "Karvan Yevlax", yeddinci turunda "Kəpəz"lə oyunlarında əsas heyətdə forma geyinib.

"Qarabağ"ın U-19 komandasının heyətində altı oyunun hamısında iştirak edib. Əsas komandada "Kopenhagen", "Atletik Bilbao" və "Çelsi" ilə duellərdə adı iştirak ərizəsinə salınıb.

Demək ki, səbəb başqadır. Heyət yetərsiz olduğundan U-19-un ÇL oyunlarında meydana çıxır, adı UEFA-ya göndərildiyi üçün əsas komandanın ÇL oyunlarında ehtiyat oyunçular skamyasında yer alır.

2007-ci il təvəllüdlü orta sahə oyunçusu "Qarabağ"ın əsas komandasında 5 rəsmi matçda 223 dəqiqə meydanda olub.