Idman.biz
"Bu görüşdə qalib gəlməsək də, həm fərdi, həm də komanda şəklində müəyyən yaxşı şeylər göstərməyi bacardıq".
Bunu "Karvan-Yevlax"ın fransalı müdafiəçisi İmani Barkeri futbolinfo.az-a müsahibəsində deyib.
Həmin müsahibəni təqdim edirik:
– "Araz-Naxçıvan" ilə səfər matçına yaxşı başlayaraq qol vursanız da, hesabdakı üstünlüyü sonadək saxlaya bilmədiniz. Komandanızın sərgilədiyi oyunu və qeydə alınan nəticəni (1:2) necə şərh edərdiniz?
– Bu görüşdə qalib gəlməsək də, həm fərdi, həm də komanda şəklində müəyyən yaxşı şeylər göstərməyi bacardıq. Bu, çempionatda istənilən güclü komandaya qarşı təkrarlamalı olduğumuz məqamlardır. Göstərdiyimiz oyun sübut edir ki, biz hər bir komandaya qarşı rəqabət apara bilərik və davamlı nəticələr əldə etmək üçün çox çalışmağa davam etməliyik. Təbii ki, mən də komanda yoldaşlarım kimi məyusam, amma biz oyunumuzun müsbət tərəflərinə fokuslanmaq və bunları növbəti qarşılaşmada təkrarlamağa çalışmaq istəyirik.
– Son matçlarda hesabı açan tərəf olsanız da, sonda meydanı məğlub tərk edirsiniz. Sanki ilk qolu vurmaq "Karvan-Yevlax"a uğur gətirmir. Bu barədə nə deyə bilərsiniz?
– Son oyunlarda ya fərdi, ya da kollektiv səylər sayəsində hesabı açmağı bacarırıq. Bu da qarşıdakı matçlarda qoruyub saxlamalı olduğumuz müsbət cəhətdir. Futbol səhvlər oyunudur və adətən az səhv edən komanda qalib gəlir. Biz son görüşlərdə erkən qol vurmağı bacarsaq da, təəssüf ki, yekun nəticə xeyrimizə olmayıb. Həm fərdi, həm də komanda halında işləməyə davam etməli, eyni zamanda, oyunun sonunda xal itkisinə səbəb olan kiçik səhvləri aradan qaldırmalıyıq.
– Çempionatın ilk dövrəsi bitdi və "Karvan-Yevlax" 11 turdan sonra 11-ci yerdədir, komandanın aktivində cəmi 1 qələbə var. Yəqin ki, bu performans sizin ürəyinizcə deyil. Daha yaxşı çıxış etməyinizə nə mane oldu?
– Doğrudur, çempionatın ilk dövrəsini cəmi bir qələbə ilə 11-ci yerdə başa çatdırdıq. Amma necə deyərlər, "ayı tutmadan dərisini satmazlar". Buna görə də biz yenidən bir araya gələcək, daha güclü qayıdacaq, çox çalışacaq və itirdiyimiz xalları bərpa etmək üçün növbəti oyunlara fokuslanacağıq.
– Liqada yaranmış fasilə "Karvan-Yevlax"a necə təsir edəcək? Fasilədən daha yaxşı vəziyyətdə qayıda biləcəksiniz?
– Fasilə çox vacib rol oynayır. Çünki dincəlmək, ailə ilə vaxt keçirmək və futboldan başqa şeylər də düşünmək bizə çox xeyir verəcək. Bu, mövsümün qalan hissəsi üçün bizi güc və enerji ilə dolduracaq.
– Fasilədən sonra ilk oyunu "Kəpəz"ə qarşı keçirəcəksiniz. Bu matçda qələbə qazanmaq mümkün olacaqmı?
– Bəli, fasilədən sonra ilk oyunumuz əsas rəqiblərimizdən birinə qarşı olacaq. Amma həm mən, həm də bütün komanda bu oyunda qalib gələcəyimizə əminik. Bunu bir dəfə etmişik, niyə ikinci dəfə etməyək ki?! Sadəcə, qol buraxmamağa diqqət etməliyik.
– Azərbaycan çempionatında ən çox bəyəndiyiniz, onlara qarşı oynayanda çətinlik çəkdiyiniz futbolçular hansılardır?
– Xüsusi olaraq heyran olduğum futbolçu yoxdur, çünki hər bir oyunçunun öz üstün və zəif cəhətləri var. Onların hər birindən öyrənmək faydalıdır. Əgər oynamağın çətin olduğu futbolçulardan danışsaq, bir neçəsini qeyd edə bilərəm. "Zirə" və "Sabah"dan Mikels qardaşlarını, "Araz-Naxçıvan"dan Hamidu Keytanı və "Sumqayıt"dan Ronaldonu vurğulamalıyam. Dediklərimin hər biri çox keyfiyyətli futbolçudur və onlara qarşı oynayarkən daim diqqətli və ayıq olmaq lazımdır.
