Sport24.az
"Neftçi"nin futbolçusu İmad Faraj "Qarabağ"a səfərdə 0:2 hesabı ilə uduzduqları Misli Premyer Liqasının XI turunun oyunundan sonra jurnalistlərin suallarını cavablandırıb.
Sport24.az həmin müsahibəni təqdim edir…
- "Qarabağ"a məğlub olduz. Oyunla bağlı nə deyə bilərsən?
- Düşünürəm ki, yaxşı oynadıq. Bir çox qol imkanlarımız oldu. Yaxşı müdafiə olunduq, çünki "Qarabağ" güclü komandadır. Amma o penalti məncə, bizim motivasiyamızı sındırdı. Fikrimcə, hər oyunda daha yaxşı olacağıq, çünki bir-birimizi daha çox tanımağa başlayacağıq və bundan sonra hər şey daha yaxşı olacaq.
- Səncə, bugünkü oyunda nəticəyə nə təsir etdi? Problem nədədir?
- Bunun xüsusi izahı yoxdur. Sadəcə o penalti bizi "öldürdü". Yaxşı oynayırdıq, hər şey qaydasında idi. İlk hissədə "Qarabağ"ın bizdən üstün olduğunu hiss etmirdik, oyun bərabər idi. Amma o penaltidən sonra ruhdan düşdük.
- Bu nəticə sizə psixoloji təsir göstərəcək?
- Xeyr. Çünki biz öz potensialımızı bilirik. "Qarabağ"ın çox güclü komanda olduğunu da bilirik. Amma bu gün onlara qarşı yaxşı mübarizə apardıq. Düşünürəm ki, növbəti oyun daha yaxşı olacaq.
- Adətən hakimlikdən narazılıq edirsiz. Bu gün də hansısa narazılıq var?
- Bilmirəm, çünki penalti epizodunu özüm görmədim. Amma məşqçimiz dedi ki, bu penalti normalda verilməməli idi. Hakim çox tələsdi, fit çaldı və nə VAR yoxladı, nə də başqa bir şey – iki dəqiqəyə penalti qərarını verdi. Amma bizə gələndə VAR-a 10 dəqiqə baxırlar. Bu dəfə isə heç vaxt itirmədən dərhal penalti verdilər.
- 11 oyundan sonra 15 xal toplamaq sizin üçün qənaətbəxş nəticə sayılır?
- Asan deyil. Çünki ilk oyunlarda çox da uyğunlaşmamışdıq – komandada bir çox yeni futbolçu var idi. Amma son üç matçda daha yaxşı idik, ardıcıl üç qələbə qazanmışdıq. Sadəcə bu oyunu uduzduq. Bu bizim liqada ikinci məğlubiyyətimizdir. Amma bir neçə ay əvvəllə müqayisədə çox irəliləmişik.
