İlnur Vəliyev: “Rusiya pasportuna sahibəm deyə, bəzi problemlər yaranıb”

Bir neçə il öncə böyük ümidlərlə  "Sumqayıt"a dəvət olunan İlnur Vəliyev "kimyaçılar"ın əsas komandasında özünə yer edə bilməyincə, yenidən Rusiyaya dönməli oldu. Ancaq İlnur Vətənində çox qalmayıb. Tatarıstandan olan qolkiper ikinci dəfə Azərbaycana qayıdıb. "Çərçivə qoruyucusu" I Liqada mübarizə aparan "Qaradağ Lökbatan"la anlaşıb. Vəliyev Sport24.az-a müsahibəsində ölkəmizə ikinci dönüşündən danışmaqla yanaşı, bizi maraqlandıran başqa sualları da cavablandırıb.

- Azərbaycana ikinci gəlişinlə bağlı fikirlərini bilmək istərdik...

- Azərbaycana qayıtmağı çoxdan planlaşdırırdım. Burda həm futbol oynamaq, həm də yaşamaq üçün şərtlər məni qane edir. Düşünürəm ki, bu dəfəki dönüşün daha faydalı olacaq. Üzərimdə çox çalışıb, özümü yaxşı tərəfdən göstərmək və yenidən elitada oynamaq istəyirəm.

- "Sumqayıt"dan ayrılmağına səbəb nə idi?

- Bu barədə danışmaq istəmirəm. Qısaca deyim ki, razılığa gələ bilmədik.

- Niyə məhz "Qaradağ Lökbatan"ı seçdin, başqa təkliflərin yox idi?

- Təkliflərim vardı. Sadəcə, daha çox oynaya, istədiyim formaya düşə biləcəyim komanda seçməliydim. Təkliflərim içində ən optimalı "Qaradağ Lökbatan"dan idi. Bu klubun I Liqada yetəri qədər təcrübəsi var. Ümumi götürəndə bu çempionat kifayət qədər rəqabətlidir. Fikrimcə, inkişaf etmək üçün I Liqa ən yaxşı variantdır.

- Komanda geridə qalan iki turda ardıcıl məğlubiyyətlər alır. Bunun səbəbi nədir?

- Hələ çempionat təzə başlayıb. Düşünürəm ki, oyundan-oyuna komandamız daha yaxşı çıxış edəcək və arzuolunan nəticələri qazanacaq. Əsas odur ki, buna inanaq və səylə çalışaq.

- "Qaradağ Lökbatan" hələ də səni sifariş ərizəsinə daxil edə bilməyib. Sənədləşmə məsələsində nə problem var?

- Belə ləngimənin olacağını gözləmirdim. Rusiya pasportuna sahibəm deyə, bəzi problemlər yaranıb. Amma növbəti tura kimi bu həll olunacaq.

- "Sumqayıt"da çıxış edərkən saytımıza açıqlama vermişdin ki, Azərbaycan vətəndaşlığı almaq və yığmada oynamaq istəyirsən. Bu arzu yenə var?

- Əlbəttə. Yenidən Azərbaycana gəlməyimin səbəblərdən biri də bu ölkənin pasportunu almaqdır. Ümid edirəm ki, yaxşı performans sərgiləməklə də bunu sübut edəcəm. Çox istəyirəm ki,  Azərbaycan millisində oynayım.

ABDULLA İSMAYILOĞLU