Sport24.az
"Oyundan əvvəl oyunçular öz aramızda söhbət edirdik. Bunun bizim üçün vacib qarşılaşma olduğunu söyləyirdik". Bu sözləri Sport24.az-a açıqlamasında "Kəpəz"in futbolçusu İlkin Qırtımov deyib.
Müdafiəçi "Səbail"lə heç-heçə (1:1) etdikləri Misli Premyer Liqasının 28-ci turunun oyunu ilə bağlı fikirlərini bölüşüb:
"Belə qismət imiş. Şükürlər olsun. Bəlkə də qələbə qazansaydıq, o biri oyunlar üçün arxayınlıq yaranacaqdı. Sonadək xal fərqini saxlamağa çalışacağıq".
Qırtımov komandanın özünə inandığını söyləyib:
"Hər görüşdən sonra yığışırıq. Heç kim Premyer Liqanı tərk etmək istəmir. Sonadək çempionatda qalmaq üçün çalışacağıq".
Zədədən sonra yaşıl meydanlara qayıdan oyunçu özü barədə də danışıb:
"Bu barədə nəsə bildirməyim düz çıxmır. Əsas baş məşqçimizin razılığıdır. Bütün futbolçular daim əsas heyətdə yer almaq istəyir. Komandamızda oyuna çıxanda hamı bir-birinə dəstək olur.
Köhnə zədəmə görə süni örtüklər mənə bir az çətinlik yaradır. Axsamağımın səbəbi bu idi, standart vəziyyətlərdə cərimə meydançasına girə bilmirdim. Ciddi bir şey yoxdur. Qısa fasilə lazımdır".
