İlkin Qırtımov: "Hər şeyi Adil müəllimin üstünə atmaq düz deyil"

"Kəpəz"in sabiq futbolçusu İlkin Qırtımovun Sport24.az-a müsahibəsi

- "Zaqatala"ya keçidin baş tutacaq?

- Bəli, yəqin ki, yeni mövsümə "Zaqatala"nın formasını geyinəcəm. Düzdü, hələ rəsmi müqavilə imzalamamışam. Amma böyük ehtimalla, doğma rayonumun komandasının şərəfini qoruyacam.

- Yəqin ki, rəhbərlik və ya baş məşqçi ilə yeni mövsümdə komandanın qarşısına qoyulan məqsəd barədə söhbətin olub...

- Əlimizdən gələn qədər yuxarı pillələr uğrunda mübarizə aparacağıq. Bu nə qədər alınacaq, onu zaman göstərəcək. Hər bir komanda kimi biz də uğurlu çıxış etmək istəyirik.

- İlk dəfə Birinci Liqa klubunda çıxış edəcəksən. Çətin olmayacaq?

- Xeyr, çətin olacağını düşünmürəm. Əvəzedici komandaların çempionatında oynayıb, çətin vaxtlar görmüşəm. Düzdür, nələrsə yad gələ bilər, amma inanmıram çətinlik olsun.

- "Kəpəz"də qalmamağına nə səbəb oldu?

- Bunun nə klub rəhbərliyi, nə də baş məşqçi ilə əlaqəsi var. Sağ olsun, İlqar və Adil müəllim qalmağımı istəyirdilər. Bəzi nüanslara görə, özüm istədim ki, "Zaqatala"ya, öz rayonuma gəlim.

- Sabiq komandan "Kəpəz" mövsümə uğursuz start verib. Səncə, uğursuzluğun səbəbi nədir?

- Hamı istəyər ki, çempionata uğurlu start versin. Mövsümlərarası fasilədə "Kəpəz"in heyəti çox dəyişdi. Yeni komandanın formalaşmasına, futbolçuların bir-birini anlamasına isə vaxt lazımdır. Hər şeyi Adil müəllimin üstünə atmaq düz deyil. Komanda baş məşqçi və meydana çıxan 11 nəfərdən ibarət deyil ki... Baş məşqçi bəzi futbolçuları düşərgəyə gətirmək istəyirdi. Şükürovun istədiklərinin bəziləri gəlmədi, gələnlər isə kollektivə gec qoşuldu. Gəncəli azarkeşlər tələbkardır. Özüm orda oynamışam, ab-havadan xəbərdaram. Yenə deyirəm, bir az vaxt lazımdır. İnşallah, hər şey yaxşı olacaq.

- Qarşıdakı günlərdə millini İslandiya və Ukrayna ilə oyunlar gözləyir. Yığma komandadan gözləntilərin?

- İlk növbədə millimizə uğurlar arzu edirəm. Legioner limitinin ləğvi futbolumuza mənfi təsir edir. Hər iki yığma ilə oyun çətin olacaq. Ümid edirəm ki, millimiz üzümüzü güldürəcək. Yığmamızdan yaxşı oyun və uğurlu nəticə gözləyirəm.

İdman.biz