İlin son ev oyunu: Darmadağınlara davam?

Millimiz sabah 2024-cü ilin son ev oyununa çıxacaq.

İdman.biz xəbər verir ki, yığmamız Millətlər Liqasının V turunda Estoniyanı qəbul edəcək.

Görüş Qəbələ şəhər stadionunda baş tutacaq. Son illərə nəzər alsaq, millimiz doğma azarkeşlər önündə ilə möhtəşəm vida edib.

Ötən il İsveçə üç qolla şok yaşadan komanda 2022-ci ilin son ev matçında Qazaxıstana eyni aqibəti yaşadıb. Son iki ildə Bakının son qonaqları darmadağına məruz qalıblar.

Bu dəfə öz meydanındakı ilə Qəbələdə yekun vuracaq yığma həmin seriyanı 3-ə çatdırmaq arzusundadır. Üstəlik, Estoniya ilə mübarizədə üstünlük qazanmaq üçün də məhz belə hesab arzulanan sayılır.

Yığmanın son 10 ildəki son ev matçlarını nəzərdən keçirsək, müsbət balansa şahid olarıq. Komandamız bu görüşlərdən beşində qalib gəlib, 2 heç-heçə edib və üç dəfə uduzub.

Düzdür, 9 dəfə son ev matçını Bakıda keçirən yığmamız bir dəfə Zapreşiçdə oynamalı olub. Amma Xorvatiyadakı görüş də pis nəticələnməyib. Belə ki, milli son 4 ildə evdəki son görüşdə uduzmayıb: 2 qələbə və 2 heç-heçə. Son yenilgi isə 5 il əvvələ təsadüf edib.

16 noyabr 2014. Bakı. AÇ. Azərbaycan - Norveç 0:1
17 noyabr 2015. YO. Bakı. Azərbaycan – Moldova 2:1
8 oktyabr 2016. DÇ. Bakı. Azərbaycan – Norveç 1:0
5 oktyabr 2017. DÇ. Bakı. Azərbaycan - Çexiya 1:2
17 noyabr 2018. UML. Bakı. Azərbaycan - Farer adaları 2:0
16 noyabr 2019. AÇ. Bakı. Azərbaycan - Uels 0:2
14 noyabr 2020. UML. Zapreşiç. Azərbaycan - Monteneqro 0:0
14 noyabr 2021. YO. Bakı. Azərbaycan – Qətər 2:2
25 sentyabr 2022. UML. Bakı. Azərbaycan – Qazaxıstan 3:0
16 noyabr 2023. AÇ. Bakı. Azərbaycan - İsveç 3:0
DÇ – dünya çempionatının seçmə oyunu, AÇ – Avropa çempionatının seçmə oyunu, UML – UEFA Millətlər Liqası, YO – yoldaşlıq oyunu

Qeyd edək ki, Qəbələ şəhər stadionundakı Azərbaycan – Estoniya qarşılaşması sabah saat 18:00-da başlayacaq.

Vüqar Xeyrullayev
İdman.biz