İlham Yadullayev: “Onların fiziki cəhətdən bizdən üstün olmaları ilk oyunda aşkar göründü”

"Sentyabrın 3-dən toplanışa start verdik. Qarşıda bizi Türkiyə U-17-si ilə yoldaşlıq oyunu gözləyirdi. İlk oyunda zəif oynadıq. Türkiyə yığması daha hazırlıqlı, aqressiv komandadı. Onlar ilk dəqiqələrdən güclü təzyiq göstərdilər. Bunun nəticəsi idi ki, standart vəziyyətdən erkən qol buraxdıq. Bundan sonra təşəbbüs rəqibin tərəfinə keçdi və fasiləyə kimi qapımızda daha bir qol gördük. İkinci yarıda da meydanda dominantlıq edən tərəf türklər idi. Onların fiziki cəhətdən bizdən üstün olmaları ilk oyunda aşkar göründü. Bu məğlubiyyətdən sonra komandanı ikinci görüşə daha yaxşı hazırlamağa çalışdım. İkinci qarşılaşma daha yaxşı alındı. İstər fiziki, istərsə də psixoloji cəhətdən rəqibə uduzmamağa çalışdıq, hətta 3 real qol imkanımız da oldu, amma şansı qaçırdıq. Ümumi götürəndə ikinci oyundan razı qaldım. Bu toplanışın bizə çox faydası olacaq". Bu sözləri Sport24.az-a açıqlamasında U-17-nin baş məşqçisi İlham Yadullayev deyib.

Millinin çalışdırcısı yığmaya dəvət etdiyi futbolçuların formada olmamasının səbəbini də söyləyib: "17 yaşlılar arasında keçirilən ölkə çempionatında cəmi 2 tur geridə qalıb. Bu səbəbdən milliyə dəvət alan futbolçular istənilən fiziki formada deyillər. Turdan-tura onlarlın daha yaxşı formaya düşəcəklərinə inanıram".

Qeyd edək ki, İlham Yadullayevin rəhbərlik etdiyi U-17 sentyabrın 9-u və 12-də Türkiyədən olan həmyaşıdları ilə yoxlama görüşü keçiriblər. İlk görüş rəqibin 4:0 hesablı qələbəsi ilə yekunlaşıb. İkinci qarşılaşmda isə heç bir komanda fərqlənə bilməyib – 0:0

ABDULLA İSMAYILOĞLU