Idman.biz
Bu gün Azərbaycan çempionatının daha bir uğursuzu bəlli ola bilər.
İdman.biz xəbər verir ki, Premyer Liqanı tərk edən "Səbail"dən sonra "Qaradağ Lökbatan" çıxış etdiyi dəstədəki yerini itirmək təhlükəsi ilə üz-üzədir.
Paytaxt təmsilçisi I Liqadan II Liqaya yuvarlanmağa yaxındır. Hazırda 22 xalla sonuncu – X yerdə qərarlaşan Bakı klubu bu gün "Karvan"ın qonağı olacaq.
Premyer Liqaya vəsiqəni təmin edən Yevlax təmsilçisi ilə görüşdəki məğlubiyyət "Qaradağ Lökbatan"ın uçuruma düşməsini rəsmiləşdirəcək.
Fərid Məmmədovun baş məşqçisi olduğu komanda heç-heçə ilə də I Liqaya vida edə bilər. Əgər hərəyə 25 xala malik "Difai" və "Cəbrayıl" arasında görüş də sülhlə bitsə, qaradağlılar üçün sonuncu – XXVII turun əhəmiyyəti qalmayacaq. Məmmədovun komandası digər matçdan asılı olmayaraq şansını saxlamaq üçün mütləq qalib gəlməlidir. Çünki sonda xallar bərabər olsa, paytaxt təmsilçisi qələbə sayında geridə qalacaq.
Bakı klubu I Liqanın ikiqat çempionudur. "Qaradağ Lökbatan" 2011/12 və 2021/22 mövsümlərində hamını qabaqlasa da, lisenziya ala bilmədiyi üçün Premyer Liqaya yüksəlməyib.
Qeyd edək ki, XXVI turun bu gün keçiriləcək "Karvan" – "Qaradağ Lökbatan" və "Difai" – "Cəbrayıl" qarşılaşmaları saat 17:00-da başlayacaq.
İdman.biz
