İki oyun, iki hədəf: Kapitanın arzuları – TƏHLİL

Azərbaycan millisinin sentyabr matçlarına çağırılan futbolçularının statistik göstəriciləri bəlli olub.

İdman.biz baş məşqçi Fernandu Santuşun ilk siyahısında yer alanların oyun və qol göstəricilərini təqdim edir.

Debüt olmayacaq!

Millətlər Liqasının İsveç və Slovakiya ilə matçlarında heç bir debüt gerçəkləşməyəcək. Çünki bütün futbolçular əvvəllər də mili forması geyinib. Söhbət Santuşun 24 nəfərlik siyahısından gedir. Portuqaliyalının özü isə millimizdə debüt edəcək. Üstəlik, sonradan da kiminsə çağırılması da mümkündür.

Yığmanın "ağsaqqal"ı

Santuşlu millinin ən təcrübəli futbolçusu Bədavi Hüseynovdur. Müdafiəçi yığmada 71 matç keçirib. Bu göstəricidə karyerasını davam etdirənlər arasında rekordçu olan Bədavini Ramil Şeydayev izləyir. Onun hesabında 63 oyun var. Digərləri isə "100"ü yarılamayıb.

Kapitan "50"yə çatır

Hazırkı heyətdə yalnız iki futbolçu 50 səddini fəth etsə də, bu rəqəm artıq İsveçlə matçda 3-ə çata bilər. Millinin kapitanı Emin Mahmudovun hesabında 49 görüş var. Növbəti sınaq onun üçün yubiley xarakteri daşıyacaq. Bunun üçün sadəcə meydana çıxmaq kifayətdir.

Qurban Qurbanovla şərikliyə son?

Kapitanın "50"yə çatmaq hədəfindən başqa qolla bağlı məqsədi də var. Emin həm də millinin tarixinin ən yaxşı bombardiri adına şərikdir. Yarımmüdafiəçi 14 qol vuran Qurban Qurbanova şərikdir. Növbəti bir qol Mahmudovu mütləq rekordçu edəcək. Sentyabrda bunun üçün 180 dəqiqə imkan yarana bilər. Bir qol həm yubiley – 15-ci olacaq, həm də yeni rekordla tarixə düşəcək.

Yubileyi gözləyənlər

Daha 6 futbolçu yubiley matçını gözləyir. Toral Bayramovla Coşqun Diniyev 25-ci, Elvin Camalovla Rahil Məmmədov 20-ci, Rüstəm Əhmədzadə 10-cu dəfə milli forma geyinmək üçün həm İsveç, həm Slovakiyaya qarşı oynamalıdır. Amin Seydiyev isə artıq ilk matçında "10"a çatacaq.

Təcrübəsiz qapı

Millinin ən təcrübəsiz xətti qapıdır. Santuşun siyahısındakı üç qapıçısının hərəsi cəmi 1 dəfə şans qazanıb. Bu a təcrübəlilərin yoxluğu ilə bağlıdır. Şahruddin Məhəmmədəliyev zədəlidirsə, Səlahət Ağayev birinci liqa klubundadır.

Qeyd edək ki, Azərbaycan milli komandası C liqasının I qrupu çərçivəsində sentyabrın 5-də Tofiq Bəhramov adına Respublika Stadionunda İsveç yığması ilə, sentyabrın 8-də isə Koşitse Futbol Arenasında Slovakiya seçməsi ilə qarşılaşacaq. Hər iki oyun eyni vaxtda – saat 20:00-da başlayacaq.

Vüqar Xeyrullayev
İdman.biz