Idman.biz
Böyük Britaniya kralı III Çarlz Berkşirdəki Vindzor qəsrində keçirilən mərasimdə 50 yaşlı futbolçu Devid Bekhemə cəngavərlik titulu verib.
Bu barədə İdman.Biz BBC-yə istinadən məlumat verir.
İngiltərə millisinin keçmiş kapitanı futbol və Britaniya cəmiyyətinə xidmətlərinə görə cəngavərlik titulu alıb.
Bekhem cəngavərlik titulundan çox qürur duyduğunu söyləyib:
"İnsanlar mənim nə qədər vətənpərvər olduğumu bilirlər - mən ölkəmi sevirəm. Həmişə monarxiyanın ailəm üçün nə qədər vacib olduğunu demişəm. Dünyanın hər yerinə səyahət etmək şansım olub və insanların mənimlə danışmaq istədiyi tək şey monarxiyamızdır. Mən bununla fəxr edirəm".
Vindzor qəsrində Bekhemə həyat yoldaşı Viktoriya və valideynləri Sandra və Devid də qoşulublar.
Moda sahəsindəki xidmətlərinə görə 2017-ci ildə Britaniya İmperiyası Ordeninin zabiti rütbəsini alan Viktoriya Bekhem, ərinin mərasimdə geyindiyi kostyumu dizayn edib və tikib.
"Kral Çarlz mənim kostyumumdan çox təsirləndi", - Devid qeyd edib.
Devid Bekhem "Mançester Yunayted", "Real Madrid", "Milan", PSJ və "Los Anceles Qalaksi" klublarında oynayıb. O, "Yunayted"lə altı dəfə İngiltərə Premyer Liqasını və 1999-cu ildə Çempionlar Liqasını qazanıb. Devid İngiltərə milli komandasında 115 oyun keçirib və 17 qol vurub. Bekhem hazırda Lionel Messinin oynadığı ABŞ futbol klubu "İnter Mayami"nin həmsahibidir.
