Sport24.az
Misli Premyer Liqasında 2024/2025 mövsümündə icarəyə götürülən futbolçulara ən çox forma şansı verən klublar bəlli olub. Sport24.az bu barədə araşdırma aparıb.
Birinci pillədə "Zirə" qərarlaşıb. "Qarabağ"dan icarəyə götürülmüş İsmayıl İbrahimli ilə Rüstəm Əhmədzadə çempionatda 47 matçda meydanda olublar. Əhmədzadə iki, İbrahimli 1 dəfə rəqib qapılarına yol tapıb.
İkinci sırada "Şamaxı" yer alıb. Bölgə təmsilçisində Cəlal Hüseynov ("Arda", Bolqarıstan), Rauf Rüstəmli və Fəxri Məmmədli (hər ikisi "Sabah") icarə əsasında komandanın formasını geyinir. Üç oyunçu 42 görüşdə iştirak edib. Onlardan yalnız C.Hüseynov adını taploya yazdırıb.
İlk "üçlüy"ü "Kəpəz" qapayır. Gəncə klubu "Turan Tovuz"dan Sadiq Şəfiyevi, "Sabah"dan isə Camal Cəfərovu mövsümün sonunadək heyətinə qatmışdı. İkisi 33 qarşılaşmada meydana çıxıb, Cəfərov isə bir qolla yadda qalıb.
"Turan Tovuz"da Anton Kraçkovski Mahaçqala "Dinamo"sundan, İsmayıl Zülfüqarlı "Neftçi"dən transfer olunub. Onlar 28 oyunda iştirak ediblər və fərqlənə bilməyiblər.
"Sabah" Rusiyanın "Rubin" kollektivindən icarəyə götürdüyü Umarali Rahmonaliyev 10 matçda iki dəfə qol vurub.
"Neftçi" Rusiyanın "Baltika" klubundan Aleks Fernandes və "Sabah"dan Rüstəm Samiqullini icarəyə götürüb. İkisi birlikdə yalnız 7 matçda forma geyinib.
"Qarabağ", "Sumqayıt" və "Səbail"də icarə əsasında çıxış edən futbolçu yoxdur. "Araz-Naxçıvan" isə "Qəbələ"dən yayadək heyətinə cəlb etdiyi Sənan Ağalarova hələlik çempionatda şans verməyib.
