Idman.biz
"Qarabağ" Bakıda "Kopenhagen"ə qarşı çox yaxşı mübarizə apardı. Zubirin qolu tələbəm Mahir Emrelinin 2017-ci ildə eyni komandaya vurduğu qola çox bənzədi. Olduqca oxşar mübarizə idi. Həmin oyunu xatırladım və o həyəcanı yenidən yaşadım".
Bu sözləri "Xankəndi"nin baş məşqçisi, Azərbaycan millisinin üzvü Mahir Emrelinin müəllimi olmuş İbrahim Uzunca futbolinfo.az-a açıqlamasında deyib.
Türkiyəli mütəxəssis "Qarabağ"ın UEFA Çempionlar Liqasının əsas mərhələsinin II turunda "Kopenhagen" üzərində 2:0 hesablı qələbəsini şərh edib. O, Abdullah Zubirin 28-ci dəqiqədə vurduğu qolu 2017-ci ildə Çempionlar Liqasının qrup mərhələsində Tofiq Bəhramov adına Respublika stadionunda Mahir Emrelinin dirəyə dəyib qapıdan keçən qoluna bənzədib: "Hesab 1:0 olduqdan sonra "Qarabağ" olduqca yaxşı mübarizə apardı. Hətta fərqi daha da artıra bilərdilər, bir neçə epizodu boşa verdilər. Eyni zamanda, rəqibə şans vermədən ikinci hissədə daha kontrollu oynadılar. İkinci qoldan sonra isə rahatladılar. Layiqli qələbə qazandılar".
Uzunca Ağdam təmsilçisinin uğurlu nəticəni davam etdirəcəyinə inamını bildirib: "Qarabağ"la qürur duyuram. Başımızı ucaltdıqları üçün çox sağ olsun. Ümid edirəm ki, bu komanda ilk 24-lüyə düşəcək. Bu mövsüm Çempionlar Liqasına yaraşan mübarizə aparırlar. İnanıram ki, uğurlarının davamı gələcək. Türkiyədə "Qalatasaray", Azərbaycanda isə "Qarabağ" bizə qürur yaşatmağa davam edir".
