Sport24.az
"Oyunun çətin keçəcəyini bilirdik. Rəqib son oyunlarda yaxşı çıxış edirdi. Matça yaxşı başladıq, erkən qollar vurduq. Böyük hesablı qələbə qazana bilərdik. Təəssüf ki, komanda olaraq çox rahatlaşdıq və cəzalandıq. Şükür ki, sonda qələbə qazana bildik". Bu sözləri Sport24.az-a açıqlamasında"Karvan"ın futbolçusu İbrahim Qədirzadə deyib.
Qədirzadə komandasının Premyer Liqaya vəsiqə qazanma potensialını belə dəyərləndirib:
"Bəli, elitaya 3 klubun vəsiqə qazanacağı dəqiqləşib. Bu, çox yaxşı haldır. Əsas da bölgə klublarının elitaya çıxmağı çox gözəl oldu. Futbol bölgələrdə gözəldir. Azarkeş dəstəyi də rayonlarda möhtəşəm olur. Bizə qarşıdakı turlarda qələbə qazanmaq lazımdır ki, "Karvan"ın elitaya qayıdışını rəsmiləşdirək. Komandamızın şansı yüksək olsa da, rahatlaşmaq olmaz.
Azarkeşlərimiz hər zaman bizi dəstəkləyir. Onlar da Premyer Liqanı haqq edir. Təbii ki, mən də yenidən güclülərin çıxış etdiyi liqada oynamaq istəyirəm. Etimad göstərsələr, özümü yaxşı tərəfdən göstərəcəyimə inanıram".
O, növbəti turda qarşılaşacaqları "İmişli" ilə oyundan gözləntilərini açıqlayıb:
"Hər tur olduğu kimi, bu dəfə də meydana qələbə üçün çıxacağıq. "İmişli" yaxşı komandadır, təcrübəli futbolçuları var. Maraqlı və gərgin matç olacaq. İnşallah, sonda sevinən tərəf biz olarıq".
Qeyd edək ki, "Karvan" Birinci Liqanın 20-ci turunda "Difai"ni 5:3 hesabı ilə məğlub edib.
